pone ku bo amor por sa ku bo ta di dje, ta ku un tatu riba bo kurpa.
Òf bo ta den un grupo di hóben, kisas un gèn. I pa demostrá ku bo ta mes tòf ku tur bo ta marka símbolo di e gèn riba bo kurpa.
Òf kisas bo ta haña un kurpa dekorá algu di un kick ku ta pone ku atenshon ta bin riba bo.
Lamentablemente ku despues di tur e doló ku bo ta sufri pa pone un tatu tin chèns ta grandi ku e amor ei ta kaba pa e míles di motibu ku por tin pa un amor kaba. I bo ta sigui ku bo bida. Òf un dia bo ta realisá ku e filosofia di e gèn no ta eksaktamente di bo.

I maske ku ta bèrdat ku kiko ku bo ke hasi ku bo kurpa ta bo asuntu, tin e situashon ku hopi hende no ta haña trabou maske ku nan tin tur kualifikashon, pasobra nan kurpa ta tatuá.
Si awe despues di tin e tatuahe riba bo kurpa, bo tin otro pensamentu i bo ke kita e tatu tin vários opshon. Pero tene kuenta ku kua opshon ku bo tuma ta bai kostabu hopi tempu, hopi plaka i te hasta lo por tin impakto riba bo salú.

Impakto di tatu
Si e tatu ku bo a pone tabata pa indiká ku bo ta forma parti di un grupo lo e por lanta reakshonnan negativo serka otro hende. I ta esaki por pone ku bo no ta haña fásilmente un trabou. Espesialmente pasobra hopi hende i tambe dunadó di trabou,  ta konsiderá ku ponementu di tatu ta algu di komportashon no sosial.
Ta bon ku awendia tin e alternativanan pa kita un tatu na un manera responsabel. Tene kuenta si ku kada método ku bo skohe por tin konsekuensia i sierto riesgo. I tur ta tuma tempu pasobra no ta posibel pa kita un tatu den un biaha.

Kon kita un tatu
Den kombersashon ku dr. Heyden el a splika ku pa kita un tatu ta dependé di vários kos. Ta dependé di kuantu tempu bo tin e tatu. Si ta un profeshonal a hasié òf un amatùr. Dependé ki kolo ku a usa, enk pretu ta mas fásil pa kita ku enk di koló. Anto dependé di e tamaño: mas chikitu e ta mas difísil e ta.
Dr. Heyden ta bisa tambe ku otro kos importante ta ku ta dependé di bo kolo di kurpa, kua rasa bo ta, si bo por kita un tatu fásil òf no.
E enk ku ta usa pa tatuahe ta un pigment. Hende blanku tin ménos problema pa kita un tatu p.e. ku e tratamentu di laser pasobra ku e método aki ta mata pigment pa kita e tatuahe. I hende blanku no tin masha pigment pa mata. Banda di esei hende blanku tin ménos chèns ku si nan hasié kirúrgikamente ku nan lo por keda ku sikatrisnan grandi (‘queloide’), hende di kolo tin mas chèns di haña e problema ei.
I e mihó manera, si bo ke ta responsabel, ta pa kita un tatu serka un dòkter spesialisá den esaki . I bo por skohe di e siguiente opshonnan:

Usa krema pa kita e tatuahe
Tin krema spesial riba merkado ku bo por usa pa hunta riba e tatuahe. E krema ta penetrá den bo kurpa i den e tatuahe i ta kibra e enk den partinan chikí ku despues ta disolvé den bo kurpa. Esaki ta un proseso masha masha poko poko mes i bo mester di hopi pasenshi. No tin garantia sientífiko pa bisa kon lihé e tatuahe lo disparsé.

Kask’é
Tin sierto produkto ku ta pone ku bo ta hunt’é riba e tatuahe i despues bo por kita e kaska benta afó. Esaki ta un proseso ku mester tuma lugá bou di guia di dòkter entrená spesialmente.

Kòrt’é kita’fo
Bo por laga hasi un operashon kaminda ta kòrta e tatuahe kita for di bo kueru i despues ta kose e espasio ku keda sera. Por hasi esaki mas efektivamente ku tatuahenan chikí., Tatuahenan mas grandi ta eksigí mas tempu pasobra ta pida pida i durante di un tempu largu ta kòrta e tatuahe pa e por disparsé. Despues sinembargo den kaso di un tatuahe grandi lo mester transplantá kueru di un otro parti di bo kurpa pa rekonstruí kaminda e tatuahe tabata.

Rask’é kita
E téknika di dermabrashon ta nesesario pa frega e tatuahe kit’é. Esaki ta manera ora bo usa papel pa frega heru òf palu brutu. Pa hasi esaki ta vèrdof e lugá kaminda e tatuahe ta òf ta pone un líkido ariba ku ta fris bo kueru. Despues ta raska e kueru kita e tatuahe. Ántes tabata hasi esaki ku salu i awa despues ku a fris e kueru.

E téknika mas moderno ku ta usa pa kita un tatuahe ta di laser. Ku e téknika aki ta penetrá ku rayonan den e kueru kaminda e tatuahe ta. E ta kibra e enk bou di superfisie di e kueru. I e ora ei ta bo kurpa ta apsorbá e pida pidanan chikí di e enk i e tatuahe ta disparsé.

Tene kuenta
Kual téknika ku bo usa  pa kita e tatuahe bo mester kòrda ku no por kit’é den un biaha. Tur e posibilidatnan ta eksigí ku bo mester bai bèk pa kontinuá ku tratamentu pa kit’é. Segun dr. Heyden no tin tampoko un téknika ku ta mas mihó ni perfekto. Den kasi tur kaso lo por keda sikatris òf kambio di kolo riba bo kurpa. I mester kòrda ku tin un diferensia di ki rasa bo ta, pa bo tene kuenta kuné riba e téknika ku bo por usa i tambe pa durashon di e tratamentu.

Konseho:
I den kaso di tantu pone komo kita un tatuahe tene kuenta pa no hasié bo mes.
Pero si no por otro sòru promé ku bo bai pone un tatuahe pa bo papia ku esun ku ta pone e tatuahe pa bo riba posibilidatnan pa kit’é despues.
I simplemente stima hopi si, pero skibi nòmber di bo gran amor riba un papel grandi ku bo ta hinka den un kuadro i kologá na muraya pa bo wak tur dia.