Ata bo reseta
For di kushina di Irma nos ta ofresébu diferente reseta pa abo ku ta baké kaba den kushina i tambe pa esun ku awor ta kuminsá eksperimentá tras di kandela.
Éksito ku bo kushinamentu
FOR DI KUSHINA DI IRMA
Reseta di batata dushi
Batata dushi ta un kuminda asina salú ku ta lamentabel ku no ta hasi mas tantu uso di e benefisionan di e rais aki. Pa basta tempu kaba tin gurunan di salú ku ta propagá batata dushi komo un alimento pa prevení desaroyo di sélulanan kanseroso den kurpa di hende.
Batata dushi ta yen yen di vitamina A, fibra i potasio. I por prepar'é komo plato prinsipal pero tambe komo un pasaboka.
Kome dushi.
Sòpi di kùri, batata dushi ku kabaron
1 kuchara grandi di manteka òf margarina
1/3 kùp di siboyo kòrtá chikí chikí
½ kuchara chikí di kùri
1/8 kuchara chikí di peper kòrá garna
2 ½ liber di batata dushi, pelá i kòrtá na blòki di 3 cm
1 apel grandi, pelá, sin pipita i kòrtá chikí chikí
4 ½ kùp di buyon, ku tiki salu
½ kùp di lechi di koko
1 kuchara di suku brùin
½ kuchara chikí di puiru di konofló
Salu na smak
¼ liber kabaron mediano kushina
Koko raspa di tost
Kenta e manteka den un panchi di sous grandi te ora e dirti, hasi esaki riba kandela mediano òf haltu. Agregá e siboyo, puiru di kùri i peper kòrá garnaa. Kushiná i drei te ora e siboyo bira moli, mas o ménos 5 minüt. Agregá e batata dushi, e apel i buyon.
Pone nan herebé: baha e kandela, no tapa e wea, te ora e batata dushi ku e apel ta moli, esaki lo dura mas o ménos 30 minüt.
Kombiná sobra ingredientenan un pa un: bati e sòpi hasi líkido den blènder te ora e bira krema. Pone e sòpi bèk den wea i drei e lechi di koko aden, suku brùin i puiru di konofló.
Kushiná te ora e sòpi kenta bon, drei de bes en kuando. (Por pone buyon adishonal si ta nesesario). Sasoná e sòpi ku salú segun bo smak.
Sirbi e sòpi den tayo hundu òf kòmchi i dòrn’é ku kabaron i alkapara.
E reseta aki ta pa 8 hende.
Bon apetit!
Pudin di batata dushi ku koko
2½ kòpi koko raspa,
2 kòpi lechi bleki puru,
4 batata dushi,
4 kuchara grandi suku,
2 kuchara grandi manteka.
Pone dos kòpi koko raspa ku e lechi den un wea. Laga e meskla aki herebé. Despues bah’é for di kandela i laga e koko keda den e lechi pa ½ ora. Despues nos ta primié i saka tur e líkido for di e koko i tira e sobra koko afó. Herebé e batatanan i laga nan bira moli i kaska nan. Nos ta machiká e batatanan brua nan den e lechi i pone e suku tambe. Drei nan bon te ora e meskla bira lihé. Ta basha e meskla den un forma plat hunta ku manteka. Ta hink’é den fòrnu ¼ di ora. Nos ta dirti e manteka den un panchi i nos ta basha e sobra koko den che i hasa e koko te ora e bira brùin. Nos ta stroi e koko hasa riba e pudin ora e ta kla. Nos por sirbié friu òf kayente.
Bon apetit.
Ròl di batata dushi machiká.
2 lb di batata dushi herebé, pida papel di fet, sèrbètè di kushina limpi, ½ lb di keshi raspa, 2 òns di ham mulá, 1 bleki sneibonchi, 1 bleki krema di lechi òf yògert.
Ta pone e sèrbètè riba mesa i ta pone papel di fet riba dje. Saka un tiki batata dushi i pone riba e papel, plat e ku un kuchara òf ku pida papel. Riba e batata ta pone keshi i ham. Meskla e krema di lechi huntu ku e sneibonchi i pone ariba. Despues ta lora e mansa na un ròl i lag’é para den frishidèr, pa despues slais e na pidanan mésun grandi.
Bon apetit.
