Protehá nos yunan
Skibí pa Reyna Joe – 18-2-2008

Un mayor bou di sirkunstansha normal ke kos bon so pa su yu.
E hende aki ta dispuesto pa hasi tur esfuerso pa asina su yu ta bon. Tòg hopi biaha nos komo mayor no tin den nos man kon nos ta protehá nos yunan.
Un menasa pa nos muchanan ta droga. Pa duru ku por ta, nos mester kuminsá papia for di chikí ku nos yunan riba droga.
Droga ta algu ku ta menasá nos yunan konstantemente. Tur dia muchanan chikí na skolnan básiko ta hañanan ta skohe: usa droga, alkohòl òf sigaria? Òf sòru pa semper keda leu for di adikshon?
E loke nan disidí ta bai determiná si nan ta limitá nan opshonnan den bida òf ku nan ta hasi uso di oportunidatnan ku bida ta duna.

Dunando nos muchanan tur dia, sin kansa, informashon ku nan por komprondé di kon mester keda liber di adikshon, nos por yuda nan.
Mayornan no mester kansa. Ni maske kon e mucha reakshoná. Sigui papia. Anto e tarea no ta di mama i tata so.
Wela, tanta, yùfrou, doñonan di trabou, religiosonan, lidernan, deportistanan, tur ku ta di akuerdo ku mester kuida nos muchanan, mester duna un man pa prevení ku un mucha ta usa alkohòl, droga òf sigaria.

Tin hopi manera pa yuda un mucha bisa nò kontra droga.Pero nan no por tuma e desishon nan so, sin yudansa di adultonan.
Ke men: sin importá ken bo ta òf kon bo ta, bo tin un deber pa yuda un mucha pa e bisa nò.
Kurashi bo mester pa bo yuda e mucha pa e bisa nò kontra droga.

Lo no ta fásil; pero kiko ta mas importante ku e mucha ku ta futuro di nos pais?
© www.konseho.com

Bo tin un reakshon? Mande na korsou@konseho.com