Ken ta bo HEROE?
Skibí pa Reyna Joe - 18-2-2008
Mas i mas nos ta tende di hendenan ku ta ‘stalk’ (purba kontra di gana di un hende pa drenta su bida). Esaki ta sosodé hopi biaha dor di fanatikonan ku ta asina opseshoná ku e persona ku nan ke ta mas serka posibel di dje.
Tambe un hende por purba na ‘stalk’ un hende ku e gusta masha hopi sin ku e hende sa mes ku e ta eksistí.
Òf bo ta haña ku un hende por ke keda ku un amante òf partner ku a kibra kuné i ta ‘stalk’ esaki pa gan’é bèk.
Esun ku ta víktima di ‘stalking’ tin biaha no ta logra na haña su trankilidat si e mes no para esun ku ta ‘stalk’ e.
E paramentu ei lo por okashoná masha hopi problema mes. Komo esun ku ta sinti kon desagradabel ta pa un hende siguibu sin bo ke i keda molostiábu, ta bon tòg pa tuma tur medida posibel pa para e eksperensia.
Sinembargo ta asina ku tur hende un momentu den nan bida ta hasi algu ku por kai den kategoria di ‘stalking’.
• Bo ta fanátiko di un banda òf artista
• Bo ta fanátiko di un gran deportista
• Bo ta simpatisá masha hopi mes ku un polítiko?
• Tin un hende konosí den komunidat ku abo masha hopi biaha mes a trata na aserká?
Si bo kontestá si riba un di e preguntanan aki splika un ratu:
• Bo a yega di skibi e hende aki un òf mas karta?
• Bo a trata na haña su number di telefòn i bo a trata na yam’é?
• Bo a sòru pa bo tambe tei den lugánan públiko kaminda e tei?
Si bo a kontestá si i maske ku bo no a molostiá di mas, tòg bo tambe ta kai den kategoria di e hendenan ku lo por pasa e límite di loke ta tolerabel pa kontakto ku un hende ku si no ta deseá e kontakto ei ku bo.
Di kon un hende ta ‘stalk’
Hopi biaha e siguimentu òf buskamentu di kontakto ta basá riba e hecho ei ku den un forma òf otro e hende aki ta bo héroe.
• Lo bo ke ta manera e.
• Lo bo ke di tin interkambio di idea kuné.
• Lo bo ke biba huntu kuné.
• Pa abo e ta e hende di mas mihó i perfekto ku tin na mundu.
Si bo rekonosé serka bo mes ku bo ta pensa asina fuerte riba un hende ku sea bo konosé òf nò, lo ta bon pa bo hasi bo mes e pregunta aki:
• Mi ke molostiá e hende aki?
• Mi ke pa e fada di mi?
• Dikon e ta asina importante pa ami?
• Mi mes tambe no ta hopi importante?
Héroe
Nos tur den nos bida tin un héroe. I tin biaha ta bon pa bo tene e héroe aki den bo imaginashon pasobra kontakto personal lo por desapuntá. Ta abo ta pensando kon e hende aki lo ta. Ke men ku tin chèns ku e hende aki no ta den nada manera abo ta pens’é.
Mihó kos den bida: ser bo mes héroe!
© www.konseho.com
Bo ke reakshoná riba e artíkulo aki? Manda bo reakshon na korsou@konseho.com.
