Mester oumentá edat di penshun
I kiko ta hasi ku hende grandi na trabou?
Skibí i kompilá pa Reyna Joe – 11 di ougùstùs 2008
Willemstad – Informashon ku a bin bon kla dilanti resientemente for di Fondo Monetario Internashonal i tambe for di Banko di Seguro Sosial SVB, ta ku mester hisa edat ku hende por bai ku penshun na Kòrsou di 60 pa 65 aña. Esaki pasobra situashon finansiero di gobièrnu i di SVB, no ta duna pa sigui paga penshun. I awor aki ta hendenan ku ta trahando ta kontribuyendo pa paga penshun di esnan ku ta kobrando penshun na e momentu aki. Pero aki algun aña tin tur indikashon ku no tin sufisiente hende hóben trahando pa karga ku gastunan di penshun. Ke men ta subi edat pa bai ku penshun i hende di mas edat ta keda traha awor.
Lógikamente ku tin konsekuensia ku mantenementu di hendenan mas grandi na trabou. Sigur den empresanan privá por nota kiko ta influensia di hendenan di edat. Pero por nota tambe ku no tin un maneho real pa atendé ku hendenan di edat na trabou. I mester ta komprendibel ku no ta meskos pa atendé mes un kos ku un hende ku ta buskando reto di trabou, un hende mei mei di su karera, ni un hende ku ta kansá di traha pero ta traha ainda simplemente pasobra e mester di sèn.
Den tur tres kaso esun responsabel pa e empresa mester sòru pa tene e empleado motivá. Sigur si tene na bista ku un empresa mester tin produkshon pa hasi ganashi pa paga empleadonan. I sigur si tene na bista e realidat ku presensia di hendenan grandi den un empresa por tin konsekuenshanan ferfelu pa kresementu i kontinuidat di bo kompania.
I no por pidi niun empresa pa hasi su maneho pa empleado ku edat haltu, kompliká.
Kiko ta embeyesimentu na trabou
Ban wak kiko ke men embeyesimentu den un empresa. E ta nifiká ku bo ta topa ku un kantidat di hende ku kabei blanku na trabou. Hendenan ku por traha pero no ta tur a bai ku tempu ke men nan no ta dominá teknologia moderno ku ta hasi bida na trabou mas fásil. Hopi hende di edat ku ta yega edat di penshun ta tambe sin nan mes ta realisá, a kuminsá baha nan aktividatnan pasobra den nan kabes nan ta kabando ku e trabou ku nan ta hasiendo; ke men nan no mester duna muchu mas.
Tambe tin hopi hende di edat ku no ta bon mas di salú loke ta nifiká ku nan ta ousente pero mester kobra sèn si.
Empresarionan ku mester di empleado pa nan trabou kana i ku ta sintá ku yen di hende di edat den servisio, mester hasi algu na e situashon aki. Algun sugerensia den empresanan na Kòrsou por ta den kaso ku ta mantené e empleado di edat na trabou pa:
- Kombiná trahadónan hóben ku esnan di edat mas haltu. Di e forma ei bo ta pone hende ku hopi energia huntu ku hende mas trankil. Tur dos si nan tin bon boluntat por siña di otro loke ta yuda e trabou ku tur dos mester hasi.
- Por motivá empleadonan di edat grandi pa nan sigui kursonan pa keda na altura di desaroyonan moderno. P.e. mester laga tur bai kurso di kòmpiuter.
- Mester motivá hendenan grandi pa nan kuida nan salú, ke men nan mester hasi ehersisio i sa kiko nan ta kome.
- Den kaso ku un bon empleado yega edat di baha ku penshun i e tin ainda debenan grandi manera hipotek, por bin ku un plan di sosten finansiero sigur si tene na bista ku su entrada ta baha despues ku e haña penshun.
- Definitivamente no mester mima un empleado di edat grandi dor di ofres’é dia di trabou mas kòrtiku òf mas dia di fakansi. Bo ta poné sinti su mes komo un empleado di ménos kategoria.
Tin benefisio
Empresanan ku tuma e riesgo di mantené nan empleadonan grandi den servisio por tin sierto benefisio sigur sigur. Si e hende di edat grandi tin interes pa keda traha anto e bentaha ta ku:
- Trahadó di edat grandi ta mèldu malu ménos biaha kompará ku empleadonan hóben.
- Gastunan èkstra pa un trahadó mas grandi (di riba 50 aña) ta neglishabel òf ta máksimalmente 3% adishonal.
- E trahadó mas grandi ta mas motivá i mas enbolbí ku koleganan mas hóben.
- Mayoria hefe ta eksperenshá ku trahadó mas grandi ta mas fiel, mas konfiabel, mas puntual i ta komuniká mihó.
