Eksitoso konferensha About Women and Health - 9 di mart 2008
Willemstad – ‘Karga bo mes responsabilidat pa bo salú, rekonosé kiko ta menasá bo salú i hasi uso di informashon disponibel na benefisio di bo salú’ ta konklushonnan ku a sali di e di sinku konferensha anual di hende muhé na Kòrsou, ‘About Women and Health’, organisá pa Bright Ideas and Services.
E konferensha ku a tuma lugá den fin di siman último na International Trade Center a konta ku partisipashon di bastante hende muhé i hende hòmber profeshonal i tambe studiantenan di IFE i di UNA.
‘About Women and Health’ a kuminsá djabièrnè anochi ku promé minister di Antia di Antia Emily de Jong Elhage hasiendo e apertura ofisial. E promé mandatario a ekspresá su deseo ku nos hende muhénan profeshonal lo sigui buska informashon pa benefisiá nan mes i nan trabou.
Despues a sigui presentashon di e oradó di òrdu Rita Andrews di RIJAAN Consultant na Washington kende a papia riba misoginia. Den su presentashon el a pasa ku esnan presente riba e diferente formanan di misoginia den komunidatnan rònt mundu i kon esaki ta impaktaa salú di hende muhé na un manera negativo.
Na final di e anochi tabata Orphaline Saleh komo miembro di hurado pa e Outstanding Woman Award, kende a presentá Mila Palm komo e hende muhé mas resaltante pa aña 2008, basá riba su kontribushon den su karera na benefisio di hende muhé i nan famia.
Djasabra a kontinuá ku About Women and Health ku gezaghèber di Kòrsou Mr. Lizanne Dindial kende a mustra ku tur hende muhé profeshonal mester realisá ku maske nan tin un kondishon médiko ku esei nunka mester ni por stroba nan funshonamentu komo profeshonal.
Oradó Dr. Justine Heyden a presentá na un manera hopi kla diferente dato pa un hende i sigur un profeshonal por yuda su mes na momentu ku e bai un dòkter, poniendo aksènt riba salú físiko, mental i seksual.
Minister antiano enkargá ku salú públiko Omayra Leeflang na su turno a presentá enfátikamente e nesesidat pa sòru pa tur hende ta salú konsiderando ku mester wak e benefisio riba tèrmino largu riba gastunan médiko.
I finalmente tabata siruhano plástiko di Aruba dr. Hunt Riley kende na un forma elokuente a mustra esnan presente kiko ta loke un hende salú mester sa promé ku e tuma e riesgo di bai hasi un operashon kosmétiko pa koregí loke e no gusta na su kurpa.
Na final di e About Women and Health tabatin un presentashon di Dr. Heyden kende a mustra hende muhénan presente kon mester buska i usa un bon brazièr pa sosten di nan kurpa i sigur si bo ta hasi un trabou kaminda ku bo ta sinta hopi.
Rita Andrews MA finalmente a duna un tayer pa partisipantenan rekonosé misoginia serka nan mes i den nan ambiente di tur dia i kon nan por benefisiá di e konosementu aki.
Un rekonosementu tambe ta bai pa e manera profeshonal ku Nohraya Godfried a guia henter e konferensha. Reakshon di esnan ku a sigui e eksitoso konferensha anual di hende muhé a demostrá ku tin nesesidat pa sigui duna mas informashon na e nivel aki. I sigur e tópiko di salú a haña hopi bon akohida..
Pa mas informashon riba e di sinku konferensha anual di hende muhé riba por bai www.aboutwomenconference.com.
