Pensa promé ku bo bai Ulanda sin destino bon planiá
Redaktá pa Reyna Joe – 18 di mart 2008
Den Haag/Willemstad - Ta sumamente nesesario pa na Kòrsou nos kuminsá komprondé kiko ta pasando den e diskushon na Ulanda riba akseptashon i toleramentu di hóbennan di Kòrsou i di otro islanan di Antia ku ta na Ulanda.
Den un reunion di parlamentu antiano djamars dia 18 di mart a bin dilanti ku e partidonan CDA i PvdA ke pa prohibí hóbennan antiano ku no tin trabou ni ku a kaba skol pa por drenta Ulanda. I den kaso ku nan ta na Ulanda kaba mester por manda nan bèk ainda segun e parlamentarionan ulandes.
Minister ulandes enkargá ku asuntunan di integrashon minister Ella Vogelaar a bisa anteriormente ku e pa tantu na Ulanda komo na Antia sigui e reglanan di enseñansa obligatorio, e lei riba trabou i skol i e lei di formashon sosial obligatorio.
Tur e plannan aki ta konektá ku e proposishon di e gabinete ulandes pa laga deklará hóbennan antiano ku faya na Ulanda komo personanan no deseá.
E diskushon riba e tópiko di hóbennan antiano difísil a kontinuá pues djamars anochi ku e plan di minister Vogelaar pa mehorá integrashon di antiano i arubano den komunidat ulandes. E plama aki ta enserá e siguiente medidanan proponé pa minister Vogelaar:
a.. Lo supstituí e enfoke segun proyekto di e kabinètnan anterior pa un aserkamentu duradero di vários aña.
b.. P’esei ya den kurso di 2008, denter di e periodo di konvenio tokante e areglonan ku e 21 munisipionan antiano ( konosí komo AG-21)
ku awor ta na vigor, lo bin mas enfoke riba maneho. E enfoke lo ta riba e temanan asistensia den kon biba, trayektonan di enseñansa i
trabou, situashonnan instabil den famia i e kuido di èks prezunan ora nan sali liber. Gruponan di enfoke lo ta mamanan teenager, gruponan di
riesgo di hóbennan i esnan ku a yega resientemente (nobatonan).
c.. Un Taskforce, ku lo keda establesí konhuntamente ku e AG-21, lo apoyá e proseso aki i lo transformá e aktual karusèl di proyekto den un
programa di implementashon operashonal pa e periodo despues di 2008.
E programa di vários aña aki ta enserá ademas di e temanan i gruponan di enfoke riba un base kuantitativo: e resultadonan, e repartishon di
responsabilidat entre e partidonan, e aktividatnan ku nan lo entamá, e manera di monitòr, kon evaluá e efektonan i e kolaborashon ku e
komunidat antiano. Na luna di yüni e Taskforce lo reportá ku un informe interino riba 1 di aprel.
d.. Lo amplia e límite di edat pa areglonan di maneho di 12-25 aña pa òf te ku 40 aña.
e.. Lo fortalesé e koperashon entre e munisipionan i e komunidat antiano tokante di e enfoke di e problemátika i lo oumentá e esfuerso
kuantitativo i kualitativo di ekspertisio antiano di tantu boluntarionan komo profeshonalnan. Pa logra esei lo instituí kursonan i treiningnan
dirigí di abilidat pa nan i lo djòin ku e medidanan den kuadro di interkulturisashon ku lo keda inkorporá den e informe riba diversidat
den maneho hubenil ku ainda lo mester keda presentá.
f.. Lo lanta un infrastruktura di saber ku ta forma e base di un desaroyo struktural i pa interkambio tokante formanan di trabou
efektivo i pa yega na un banko di dato uniforme.Den e kaso aki lo kolaborá estrechamente ku e Sentro di saber sosial (Sociaal
kenniscentrum) na Kòrsou. Na mart di 2008 lo tene konhuntamente e promé konferenshanan di trabou, ku enfoke riba e deskripshon i distribushon di
enfokenan eksitoso eksistente (best practices).
g.. Den kuadro di restringí i redusí di e sobre representashon di Hulandesnan Karibense den kriminalidat , lo investigá e índole real i e
grandura di e problemátika di insufisiente motivashon pa partisipá na trayektonan di resosialisashon. Ku esakinan komo base e lo hasi e maneho
hudisial mas skèrpi.
h.. Den e kuadro aki e efektividat di intervenshonnan hurídiko enfoká riba e manera di kon ta anda ku kriminalidat bou di e grupo aki lo keda
investigá mas aleu i kaminda ta nesesario oumentá ainda mas.
i.. Ademas lo mehorá e konekshon di e 'nazorg' ku munisipio ta duna den e trayekto hudisial.
j.. E relashon ku e reformanan di e struktura polítiko na Antia Hulandes ta preparando un Lei di Reino riba Tráfiko di Persona, den kua un di e tópikonan lo ta tráfiko liber di persona ku nashonalidat hulandes den tur parti di Reino, ku komo eksepshon , basá riba base di resoprokashon, e deklarashon di personanan
no deseá den kuadro di órden públiko òf di siguridat.
k.. Ademas lo averiguá kon e paisnan mutuamente por sigurá ku lo kumpli ku e enseñansa obligatorio , e deber di enseñansa i trabou i e deber di formashon sosial.
l.. Lo mi hasi esfuerso pa huntu ku e minister di (Hubentut i Famía) i e sekretario di estado di OCW mira te kon leu un enseñansa obligatorio ampliá por optené un base legal, ku n'e mes tempu ta aplikabel pa Ulandesnan Karibense.
m.. Lo bini un programa di interkambio den kua riba nivel di e personal, saber i eksperensha entre e asina yamá munisipionan di Antia i Kòrsou ta
keda repartí riba tereno di enseñansa i hubentut. E interkambionan ta tuma lugá koordiná i ta dirigí pa por yega na un resultado duradero.
n.. Lo hasi konvenionan entre Kòrsou, BZK, WWI, AG-21 i VNG riba kon ta kubri gastunan pa e interkambio aki di saber i eksperensha.
o.. Lo traha pa yega na un enfoke konsekutivo final entre Ulanda i Kòrsou kon por yega na un oumento di e efektividat pa por interkambiá e
dunamentu di yudansa i informashon (referensha) entre ámbos pais tokante personanan.
p.. Ku eksperensha ulandes lo duna un impulso n'e enfoke integral den barionan na Kòrsou.
Bo ke reakshoná riba e informashon aki? Bo por manda un e-mail na korsou@konseho.com
