Tur esten ku otro hende ta gosando di e dushi ambiente di Pasku i di Aña Nobo, tin hende tambe ku ta den e situashon di no tin e suerte di tin otro hende pa yena nan ambiente festivo kuné. Esaki por ta pa motibu di nan mes manera di hasi i biba, un òf mas di nan hendenan a muri den e aña ku ta tras di lomba òf simplemente tin otro sirkunstansha sosial, finansiero òf otro ku ta hasi ku nan ta pasa dianan di fiesta nan so òf den soledat (pasobra bo por sintibu so den presensia di otro hende tambe). Un kos ta sigur: ku e ambiente artifisial òf no di alegria i yovialidat, ta hasi hende ku ta so sinti nan mes masha malu, pasobra nan no tin hende pa yena nan dia pa nan.

Si abo ta un di e hendenan ei nos ke kompartí ku bo algun pensamentu pa yudabu yena bo dianan di fiesta i hasi e momentu di soledat mas poko i fásil posibel:
a. Wak kua aktividat tin ku ta públiko ku bo por bai i ku na mes momentu ta dunabu un sintimentu di seguridat. Por ta ku ta sea un komementu spesial den un restorant òf un fiesta òf show. Averiguá si mester hasi reservashon pa bo no yega te einan pòrnada.
b. Traha un lista di hende ku bo ta apresiá i yamanan dia di Pasku òf Aña Nobo. Esun ku no ta disponibel, ku no tin tempu pa papia no ta nada. Sigur lo bo por haña den e lista un òf mas ku tambe lo ke tin un hende pa kòmbersá un ratu kuné i yena un buraku di soledat.
c. Bai un biahe den dianan di fiesta. Mi amiga Andrea su kasá a muri e aña aki i e a skohe pa bai un biahe krusero di tres siman na Oustralia. E ta bai e so i el a bisami ku e tin sigur ku e lo topa ku ken ku ta pa e yena su tempu kuné banda di e keirumentu ku di mes ta envolví otro hende tambe.
d. Dediká e hopi tempu ku bo tin pa skibi. Skibí di bo pensamentunan, bo eksperensianan, bo bida, i bo deseonan. Esaki lo por ta kuminsamentu di un karera nobo komo outor.
e. Wak pa semper bo tin un hòbi. Di mes atendiendo ku e hòbi ku ta algu ku bo gusta hopi outomátikamente bo no tin ten pa pensa kosnan ku ta hasibu tristu i ponebu sintibu laf.
f. Buska un òf mas bon buki pa bo lesa. Lesamentu ta dushi i ta lagabu haña eksperensianan úniko, bishitá paisnan i lugánan ku lo bo no yega nunka i por inspirábu pa tuma mihó desishonnan pa bo mes.
g. I sòru pa bo tin amistatnan sano ku hende ku kende bo por ta na momentu ku soledat ta dalbu. Kisas abo ta esun ku tambe ta yena nan bida. 

I si ainda bo tin tempu liber ku bo no sa ki hasi kuné: primi riba ‘papia ku mi’ (ariba na man robes) dianan 25 i 26 di desèmber 2007 i dia 1 di yanüari 2008 i lo mi tei di 10.00 pa 11.00 pa nos papia un ora largu i interkambiá di idea e.o. riba kon yena bo biba ora bo ta sintibu so i tambe riba diferente otro asuntu.

Reyna Joe

Nota:

Mester bisa ku nos di konseho.com ta hopi kontentu ku esnan ku a hasi uso di nos sistema di 'Papia ku mi'. Nos lo buska otro oportunidat pa sigui papia ku bo.