Práktikanan ilegal den salon di beyesa

Segun un komunikado di prensa di Departamentu di Inspekshon di Salu di Gobièrnu Sentral di Antia - emití 28 di desèmber 2007

Inspekshon di Salú Públiko di Antia a bin ta alertá riba práktikanan ilegal ku ta tumando lugá den salonnan di beyesa, pero apesar di atvertenshanan, repetidamente ta haña indikashonnan ku e práktikanan aki ta sigui tuma lugá. Último simannan Inspekshon di Salú Públiko a bin ta intensivá su investigashonnan i esakinan a kuminsá duna resultado.

Inspekshon di Salú Públiko ta konsiente di e desaroyonan ku ta tuma lugá den mundu di beyesa i di glamur i a konstatá ku salú di diferente kliente ku ta bishitá e salonnan aki ta keda afektá negativamente i hasta tresé na peliger.
Ta haña señalnan ku den e asina yamá salonnan di beyesa (beauty salon), ta hasi sierto práktikanan ku segun nos leinan ta dòkternan studia so por hasi; por ehèmpel pasamentu di angua.
Hasta tin hende ku ta yama nan mes dòkter ku ta trata kliente den e salonnan. Nan no ta dòkter pasobra nan no a studia medisina i ta p’esei nan no ta outorisá pa traha komo dòkter na Antia (nan no a presentá nunka un diploma pa keda evaluá i aprobá). Tambe ta sosodé ku ta usa remedi no registrá òf remedi i otro produktonan ku por kousa hopi daño físiko na kurpa i kútis di e kliente.
Loke si Inspekshon di Salú Públiko ke, ta pa komunidat ku ta pidi e servisio, ta konsiente di e loke nan mester tene kuenta ku n’e pa protehá nan mes salú. Tambe esnan ku ta duna e servisio aki mester tené nan mes na reglanan.

Inspekshon di Salú ke pa pèrsonanan ku ta hasi uzo di salonnan di beyesa, sa kon pa nan protehá i kuida nan salú. Pasamentu di angua por solamente riba òrdu di un dòkter, pasobra tin riesgonan mará na esaki ku por tin peliger di bida. Tur sorto di infekshon por keda traspasá ku angua. E kueru o kútis por keda infektá ku heridanan ku pus òf haña marka ku sikatrisnan mahoso komo konsekuensha. Sanger di e kliente por keda infektá ku Hepatitis B i te asta ku HIV/AIDS. Si no pasa e angua korektamente, esaki por afektá nervionan òf adernan  ku konsekuenshanan hopi desagradabel. E produktonan ku ta uzá por ta kontaminá ku bakteria òf vírusnan òf por kousa reakshon alèrgiko serka personanan ku ta sensibel pa esakinan.

Hopi biaha no ta konosí mes di unda e produkto di beyesa ku ta usa ta bini, bou di ki sirkunstansha esakinan ta fabriká, ni ki sustansha nan ta kontené. Tur esakinan ta pone ku bo ta kore riesgo sin nodi na momentu ku bo ta laga inyektábu den salonnan di beyesa.

Ta sosodé tambe ku asina yamá spesialistanan di beyesa i dòkternan estranhero di manera ilegal ta bin di afó pa hasi práktikanan ku riesgo, hopi biaha bou di sirkunstanshanan a-higiéniko. E hecho aki no solamente ta ilegal pero no ta profeshonal tampoko i tin riesgo ku n’e. Na momentu ku surgi komplikashonnan manera infekshon òf mal formashon, esnan ku a trata e kliente a disparsé for di pantaya. E ora ei e dòkternan lokal lo tin ku trata di salba loke por salba ainda.
Teniendo kuenta ku salú públiko, Inspekshon di Salú Públiko ta vigilá pa tantu salonnan di beyesa komo otronan ku ta ofresé e tipo di tratamentunan aki, mantené nan na reglanan stipulá pa lei.

Den un akshon di Inspekshon di Salú Públiko djaweps dia 20 di desèmber, a topa un situashon kaminda tabata violando diferente lei i regla.

E situashon ku a topa tabata den un salon di beyesa, kaminda tabata praktikando pasamentu di angua pa kita ploi. Pa kolmo e produkto ku tabata hasi uso di dje ta un remedi ku no ta registrá na Antia, pues ku a keda importá i uzá ilegalmente. Si tabata asina, ku e práktika di pasa angua tabata sosodé dor di un médiko-spesialista, pero e médiko a resultá di ta “estranhero” ku no tabata outorisá pa traha komo dòkter na Antia, pues no por práktika legalmente na Antia òf spesífikamente na Kòrsou.

Mesora, Inspekshon di Salú Públiko a prohibí e médiko-spesialista pa sigui trata klientenan. A konfiská tur loke tabata uzando den e práktika aki  i a duna e médiko-spesialista un atvertensia serio. Tambe a atvertí esnan di e Salon di Beyesa seriamente pa den futuro tipo di práktikanan ilegal no tuma lugá den e salon.

Inspekshon di Salu Públiko ta urgi komunidat pa tur hende informá nan mes bon, promé ku tuma un desishon si kier bai buska un sierto tratamentu ku por tin su konsekuenshanan ménos agradabel pa nan salú. Papia ku bo dòkter di kas tokante uso di remedi, yerbanan, medisina i otro produkto alternativa etc.. I semper por tuma kontakto ku Inspekshon di Salú Públiko pa mas informashon.

Inspekshon di Salú Públiko ta keda na Schouwburgweg 24-26, tel.: 466-9366 / fax: 466-9367, e-mail ivg@gov.an.

korsou@konseho.com