31 di yanüari 2009

Kon ta bai,
Mi ke a puntra na kiko bo ta sa presis ku bo partner ta un adikto na sèks i ademas bo ta sospechaa hopi profundo ku e ta infiel.
Konsehá mi ki pa hasi.
Sospecho

Apresiable Sospecho
E palabra adikto ta algu hopi serio. Si e ta adikto na sèks anto e ora ei e tin chèns di ke hasi sèks konstantemente no ku abo so pero ku ken ku ta djis pa satisfasé su adikshon. Den kaso ku e deseo pa hasi sèks ta algu ku e no por dominá anto e ora ei e mester di un tratamentu. Tuma e kos aki na serio si bo ta kere esei i trata na papia kuné riba su problema pa evitá ku e ta hasi su mes, abo i otronan daño ku su komportashon sin kòntròl.

Pa loke ta bo sospecho di ku e ta infiel tene kuenta ku semper bo sintimentunan ta alertábu di kosnan ku bo mes no ke wak (ainda). Ke men ku si bo tin e sospecho basá riba duda, tin chèns grandi ku bo partner ta infiel na abo di bèrdat.
Pa duru ku esaki por ta, trata na papia kuné pasobra bo bida tambe ta na peliger si e bai hasi sèks ku otro hende (tin chèns sin niun protekshon) i despues bin hasi sèks ku abo sin protekshon. Ta di e forma aki abo mes por keda infektá dor di bo partner ku malesanan transferí seksualmente ku ta inkluí tambe infekshon ku HIV ku ta okashoná e malesa mortal AIDS.

Si bo tin duda, konfia bo sintimentunan i tuma akshon pa tene bo bida for di peliger. I den kaso ku bo no por papia ku bo partner riba su problema i komportashon ta rekomendabel pa bo stima bo mes i bai lag’é.
Hopi éksito.

Madam Katrina

Kontesta di dia 23 di yüni 2008

Bon dia Madam Katrina,
Awe pa di tantu bes mi tin un diskushon ku mi frei riba loke e ta yama "ko’i kèns". Ta di tantu bes ku mi ta diskutí kuné i ya mi no sa kiko pa hasi. Mi a bisa mi frei pa kòrdami algu pa mañan. Su kontesta tabata ku si e kòrda e lo kòrdami pasobra e tambe ta drùk, e tin prioridatnan. Mi no a gusta e reakshon di dje pasobra mi ta pensa ku si e lo pidi ami, ami lo pone e kos di dje ei komo un di mi prioridatnan banda di mi mes prioridatnan.
Madam Katrina mi ta pidi mi frei pa yudami kòrda pasobra ku ta e ta mi partner kaminda mi ta yega ora mi mester.
Despues e diskushon a bira ku e ta bisami ku mi ta hasi kos di mucha chikí i ku mi ta pleita pa ko’i kèns. Mi no ta kere ku si un kos ta molestiábo bo no por papia di dje ta p’esei e kos yama un relashon pa papia di kosnan bon i malu ku bo ta sinti i purba na solushoná nan, pasobra no tin niun partner ku ta 100% bon.
E ta bisami ku si algu ta pasa mas bes e si ta siña di nan p’esei e no ta ni primintími nada p’esei e ta bisami ku si e kòrda lo e bisami si e no kòrda e lo no por bisami.
Mi ta saka afó di loke e ta bisami ku mi a yega di reklam’é ku e no ta kòrda nada si ta konserní mi kosnan personal i p’esei awor e ta kouteloso na bisami ku e no ta ni primintími nada. P’esei e ta bisami dje manera ei ku si e kòrda lo e bisami si e no kòrda e lo no bisami.
Mi sintimentu ku mi tin ta ku mi pensamentunan ta ménos ku di dje, ku ta e so ta pensa bon; e tin palabra na ora i tin biaha ami no sa kiko bisa, ami ta keda sin sa ki bisa pasobra mi punto ku mi trese dilanti òf e ta ko’i kèns òf e no ta komprondé pasobra su punto so ta wòrdu trese dilanti ketu bai den e kòmbersashon di mi a pèrdè na kaminda, mi kontestanan no tin balor, pasobra pa kada un kos mi bisa e ta keda trese kos dilanti, mi ta papia pero e ta manera fòrsa su opinion riba mi.
Mi ke Madam Katrina pa e pensa so "ta dikon” mi a bis’é e kos aki ta pasobra di bèrdat lo mi ta sinti malu ku e no ta kòrda algu ora mi pidié ku kisas e por kambia algu ku e ta atendiendo kuné òf purba na drecha e kos dor di hasi su esfuerso pero e no ke desviá di su pensamentunan i sintimentunan. Si e bisami algu mi ta bai pens’é un òf dos dia i evaluá pasobra mi ta bisa mi mes mi frei no ta bisami algu pòrnada ta pasobra e ta sinta kuné.

Komo hende muhé mi ta spera e hasi mas, avisámi kiko si i no, puntrami dushi kiko mas bo mester, kiko mas tin di hasi? Mi ta puntra mi mes dikon e no ta yudando mi, akaso mi kosnan no ta interes'é? Mi tin gana di dje pero ta mi ta tene relashon kuné e no ta tene relashon ku ami, hopi bes ami tin di kuminsá e akto pero mi tambe ta sinti nesesidat di un dia e kuminsá e akto, ku karisia i palabranan dushi. Hende muhé hopi bes ta bisa ku nos hende hòmber no ta sirbi ku nos ta gaña, ku nos ta hasi tur maldat dje mundu aki pero ora bo wak bon tin hopi muhé ku no ta balorisá un hende hòmber. Madam Katrina danki pa a lesa mi karta.

Un kurason desapuntá.

Konta bai Kurason Desapuntá
Tin hopi punto ku ta bin dilanti pero loke ta importante pa bo tene kuenta kuné den un relashon ta e echo ku den un relashon tin 2 hende ku
¨ Diferensia di edukashon i formashon
¨ Diferensia di kustumbernan sosial i di kas
¨ Diferensia den nesesidatnan humano
¨ Diferensia den ekspektativa di un relashon
¨ Diferensia den eksperensia ku relashon(n) anterior
¨ Diferensia den karakter
Konsiderando e diferensianan aki ta di komprondé ku na momentu ku bo kuminsá un relashon bo mester hasi palabrashonnan pa huntu disidí ki rumbo e relashon ta bai basá riba nesesidat, eksperensia i ekspektativa di tur dos.
Relashon en general ta keda romantisá hopi sigur den pelíkula i novela pero den bida real un relashon bon òf malu ta determiná kon nos ta bira i aktua.
Ta parse ku hopi hende ta drenta un relashon sin hasi e palabrashonnan ku mester garantisá ku e relashon ta bai dura.
I ta p’esei bo ta haña ku dado momento den e relashon por sali e diferensianan i nan por stroba loke mester ta un bon relashon.
Pa bin riba bo prekupashon: pa solushoná e situashon aki bo mester papia ku bo frei pa asina ei e komprondé bo nesesidat i deseonan. Si e kòmbersashon aki no duna resultado anto esei por ta un indikashon fuerte ku abo, ku tin sierto nesesidat ku bo ta ekspresá, mester reevaluá e relashon i bo ròl den e relashon. Kua desishon ku bo tuma mester ta basá riba e kosnan bon ku abo ta rekonosé ku mester tin sigur sigur den boso relashon.
Ser realista i wak kiko e relashon tin aden pa abo. Si bo ta kreyente i promé ku bo tuma kualke paso òf desishon, mi ta konsehábu pa hasi e siguiente orashon un kustumber mainta ora bo lanta i tambe ora bo sinti e nesesidat durante di dia. Bo tin ku hasi esaki 9 dia largu i disidí despues di e nuebe dianan, basá riba inspirashonnan ku bo haña, ki desishon bo ke tuma pa futuro di bo relashon.

Orashon:
Kreadó yudami tuma desishonnan korekto den mi relashon.
Lagami ta honesto ku mi mes i ku mi partner di bida.
Guiami na momentu ku mi mester ta fuerte pa tuma desishon pa mi mes den mi relashon
Abri mi mente pa mi tin komprenshon pa mi akshonnan i akshonnan di mi partner;
Laga mi skucha Bo bos na momentu ku mi no sa kon reakshoná i ku mi ta husga sin sa dikon otro hende ta aktua manera nan ta aktua;
Kreadó lagami ta grandi na momentu ku mi mester ta i humilde ora ta mi turno di ta humilde;
Siñami komprenshon i kompashon i hasimi fuerte pa mi por tuma mihó desishon posibel.
Amèn

Forsa.
Madam Katrina

Kontestanan di dia 23 di mart 2008

Madam Katrina bon dia
 
Mi ta sintá ku un problema di famia ku na mi pareser tin di haber ku orguyo di mi ruman. Mi ruman a fia nos tata sèn i segun e, e tin un akuerdo ku nos tata ku ora nos tata
pag’é bèk, nos tata lo dun’é 1000 euro mas riba e suma di e sèn ku e debe i asina mi ruman ta pone e 1000 euro pa e kumpra un outo.
E akuerdo tabata ku nos tata ta paga 400 euro bèk tur luna i asina paga tur e suma ku e debe mi ruman bèk.
Mi tata a fia e suma aki di mi ruman pa e paga belasting bèk loke e debe.
Mi tata no a paga e belasting bèk sino komo ku mi ruman chikí a kaba su skol, el a usa e sèn aki pa duna mi ruman chikí un regalo pasobra el a logra su diploma di HAVO.
Awor mi ruman hòmber grandi ke men ku mi tata mester a paga e belasting bèk manera el a bisa ku e tabata bai hasi.
Pero ami ta di pensamentu ku bo a fia un hende un kos i e mes ta disidí kiko e ta hasi ku e kos; abo komo fiadó mester solamente atendé ku si ta pagabu bèk si òf no. Ke men ku bo no por disidí pa un hende kiko e ta hasi ku un sèn ku abo a fi’é.
 
Mi ruman a bèl molestiá mi tata tur dia pa e sèn, bis’é ‘ki dia mi ta haña mi sèn bèk i papia yen kos ku mi tata.
Kaminda mi tata tabata tin un akuerdo pa paga tur luna bèk 400 euro i e kos aki a traha ku mi tata te ku e tabata bèl mi bisami ku e ta tristu pa e manera kon mi ruman ta hasi kuné.
Nos tata a kobra sèn di trabou i a paga mi ruman e sèn bèk den dos pagá, e no a dun’é e sèn èkstra di 1000 euro pasobra segun mi tata e no tin pakiko di duna nada mas, e no ta obligá di duna mi ruman nada mas sino loke e debe so.
Awor mi a bai papia ku mi ruman pa wak kiko ami por a hasi pa solushoná e problema.
Mi a kòrd’é tambe ku nos tata no ta un hende ku sa keda sin paga su kosnan i ku semper el a yuda nos i duna nos.
Mi tata a yega na kumpra outo pa mi ruman; paga su butnan i hasta papia ku skol ora e tabata hasi kos di prèt pone mi tata su kara na bèrgwensa. Aworakí nan no ta papiando ku otro paso mi ruman ke men ku mi tata a primintié i e no ke kumpli; ku e ta falsu i
ku el a lanta falsu testimonio i dun’é speransa ku e lo haña 1000 euro mas.
Ora mi a papia ku mi tata mi tata ta bisami ku e no a primintí niun ora so 1000 euro sino 500 euro i ku e no ta bai duna mi ruman nada mas i si akaso e ke dun’é e 500 euro mi ruman lo tin di warda te dia e haña sèn pa dun’é paso el a kaba di page den dos paga tur loke e debe.
Ami a duna mi ruman 400 euro pa e kos aki kaba i pa e laga mi tata na pas paso mi no ke mira mi tata di 65 aña ta kunsumí pa algu asin’aki ku ta material.
Mi a purba di papia ku mi ruman pero e tin hopi orguyo i e ke men ku mi tata mester pidié despensa. Mi a hasta pensa di skirbi mi ruman un karta.
 
Madam Katrina kiko mi tin di hasi? E problema aki tin mi ku mi no por konsentrá riba mi lèsnan i mi tin hopi prekupashon.
Ruman Prekupá.

Apresiable Ruman Prekupá
Bo tin hopi rason di ta prekupá pasobra e tipo di situashonnan aki no ta dushi.
Den loke bo ta presentá tin asina tantu punto ku mester haña atenshon. Na promé lugá kiko por ta motivashon real di bo ruman pa ta sin rèspèt pa ku bo tata. Pasobra unda a sali ku yu ku a haña sosten di un tata henter su bida no por yuda e tata bèk sin niun eksigensia ni niun papiamentu riba e tata.
Kisas tin kosnan ku a pasa entre bo tata i bo ruman ku ta duna bo ruman e poder i chèns pa trata bo tata di e forma aki. Òf bo ruman sa algu di bo tata ku boso niun otro no sa. Esaki ta algu ku abo lo no por komprondé ni sa pero realisá ku por tin algu ku abo no (por ta) na altura di dje i ku ta resultá den e situashon di awe.

Ta bin aserka ku ora un hende fia sèn p.e. na un instituto finansiero e tin di duna kuenta pa kiko e ta bai usa e sèn ku e ta fia i e mester tene su mes legalmente na e palabrashon. Den e kaso aki; segun mi por asumí di bo splikashon, no a firma niun akuerdo ke men ku ta keda na loke tantu bo tata komo bo ruman ta bisa di loke nan a komprondé di e akuerdo ku nan tabatin, pasobra no tin niun dokumento ofisial. Purba na keda pafó di e situashon di boso tata i bo ruman, maske kuantu prekupashon e situashon aki ta trese pa bo.

Bo tata na su turno ta e adulto ku mester tuma desishon pa para e situashon ku e mes a hinka su mes aden. Ta e mester ta ehèmpel pa boso i si e no por hasié ta di lamentá, sigur si mira e situashon ku e asuntu aki a hink’é aden.
 
Bo ruman a mustrabu ken e ta, wak pa bo no lubidá esei. Fe chikí e ta hinka su mes den problema i ta bo tata mester a sak’é di esei. Aparentemente e tin e karakterístikanan ménos agradabel ku bo ta nota aworakí for di chikí.
Tuma un lès aki tambe di si bo mes mester fia sèn un dia pa bo hasi esaki na un instituto finansiero kaminda ku si bo tene bo mes na e kondishonnan stipulá bo no ta hañabu ku niun  asuntu emoshonal sin nodi aserka.

Mi úniko konseho ta pa maske kon difísil i desagradabel e situashon ta pa bo ku bo mester hala un kantu laga nan dos atendé nan asuntu. I tin biaha bo mester laga kos bai manera e ta bai pasobra abo tin di sòru pa abo no tin problema ku otro hende pa motibunan ku no ta abo mes ta okashoná. Tur dos ta mas grandi ku bo. Tur dos tin mas eksperensia di bida ku bo. Tur dos mester sa kon mahos ta ora tata i yu abiertamente ta demostrá falta di union i di rèspèt. Tur dos mester usa nan sintí.
Abo pone bo atenshon na bo lèsnan pa den futuro bo por tin un trabou ku ta dunabu sèn ku bo no mester fia sèn serka niun hende. I si bo ta kreyente resa pa bo tin forsa mental pa surpasá e kosnan desagradabel di bida ku bo ta topa kuné maske ku bo no tin niun falta. Pues laga nan mes atendé nan asuntu i bisa nan esaki na un manera mas agradabel posibel pa abo si keda bon ku tur dos.
Hopi éksito.

Madam Katrina

Kon ta bai Madam Katrina
Algun tempu pasá mi a partisipá na un evento kaminda mi a sali esun di mas mihó. Mi tabata hopi kontentu i felis pasobra esei tabata algu ku mi tabatin masha deseo di logra.
Mi mihó amiga a bai tur aktividat ku mi pero e semper a bisa ku esei no ta partisipá na e kosnan ei.
Awor ta resultá ku un siman despues tabatin un fiesta pa tur partisipante i mi amiga ku semper ta bai tur kos ku mi a bisami ku e no por bai. I despues di esei e no ta atendé ku mi mas. Mi a puntr’é ta kiko ta pasando e di ku ta ami ta hasi manera mi ta masha kos awor ku mi a gana i ku ta ami ta hasi straño. Ta duel mi ku e éksito di mi a ponemi pèrdè mi mihó amiga. Kiko mi mester hasi pasobra mi no por bira oloshi bèk pero ta duel mi ku mi a pèrdè mi amiga pa algu ku nos tur dos a pasa masha dushi kuné.
Madam Katrina ta kere ku mi tin di bai wak kon haña su amistat bèk?
Tristu i desapuntá

Apresiable Tristu i desapuntá
Lamentablemente mi mester afirmá ku den bida tin amiganan ku no tin e forsa pa karga éksito di esun ku ta kere ku nan ta bon amiga. Un hende ku no ta gusta ku abo tin logro i ku a mira tur paso i esfuerso ku bo a hasi pa por logra loke bo tin awe, ta un hende ku nunka tabata ke pa bo viktoria. E ta yalurs i envidioso.
Pa duru ku esaki por ta e ta algu ku bo mester akseptá. I legumai e amiga ei ku no tin e forsa pa sostené abo. Pasobra bo no sa kiko lo e por hasibu si bo keda huntu kuné.
Ya bo tin un éksito tras di bo lomba ke men sigui buska mas éksito. I kòrdá ku bo ta so den tur loke bo ambishoná.
Hopi éksito mas pa bo.

Madam Katrina

Madam Katrina kon ta bai
Mi tin un situashon ku mi no por papia ku niun hende pasobra mi tin miedu ku mi kasá ta haña sa.
Mi kasa no ta tratami bon. Ami mester traha pa kria mi mes i mi yunan pasobra e no tin trabou i ta bisa ku ta difísil pa e haña trabou. Ku mi sèn mi mester hasi tur kos na kas i e sèn no ta yega.
Mi kasá sinembargo ta bisami tur dia ku e ta matami si mi pensa so na bai lag’é. Mi ta bis’é ku e mester buska un moda pasobra mester di sèn i e ta kuminsá zundra i yamami tur sorto di kos mahos dilanti di e muchanan. I e a bisa e muchanan ku si mi sigui asina aki e ta matami. Mi yunan tin miedu i ami tambe pasobra si mi no tei ta ken ta kuida mi yunan. E no, pasobra e no tin sèn ni manera.
Madam Katrina kiko mi mester hasi?

Miedu

Apresiable Miedu
Ta un kos mi por bisabu anto esei ta kuri i kuri hopi duru bo bai. Bo meresé mihó!!!
Bo ta kasá ku un abusador i e sa ku e ta abusador. Kiko ta duna un hòmber derechi pa kasa ku un hende muhé i kaba dun’é hopi mal bida? Bo kasá mester ta un hòmber ku hopi problema i na lugá di e buska solushon e ta purba na laga abo kere ku ta abo ta esun ku ta malu i ku no ta sirbi.
Bo mes tambe ta keda responsabel pa bienestar di bo mes i di bo yunan. Si bo ta serio i bo ke sali for di e situashon bo por tuma kontakto ku e Ofisina pa Yudansa na Víktima. Nan lo por yudabu konfidensialmente ku konseho i ku un solushon pa bo i bo yunan sali di e situashon peligroso ei pa boso bida. I kòrdá tambe ku si bo kasá ta menasábu ta pasobra e sa ku e tin abo den su gara kompleto i e sa ku bo tin miedu ke men bo ta hasi loke e ke: keda den un mal bida ku un hòmber ku ta sinbèrgwensa, peliger pa bo bida, bashí i mal ehèmpel pa bo yunan.
Bo mester hasi un denunsia na reshèrshi pa e menasanan aki ya ora kiko ku ta pasa bo ta protehá pasobra bo a hasi denunsia legal kaba.

Bo meresé mihó, buska un solushon pa sali di e situashon aki pa skapa bo bida i di bo yunan i pa bo por kuminsá un bida di nobo sea bo so òf ku un hòmber ku si ta respetábu.
Hopi éksito.

Madam Katrina