Si bo no sa anto puntra na Konseho.com i haña sa mas di etiketa i komunikashon, dos kos masha importante si nos ke logra den bida, pa nos tin bon relashon den nos kas, na trabou i den grupo di amistat.
Etiketa ta reglanan skibí i no skibí di kon nos mester komportá korektamente ku otro.
Komunikashon ta bin di e palabra latin 'communicare' i ta nifiká nada mas ku manda i risibí informashon pa nos por komprondé otro.
Tur dos ta hèrmèntnan ku nos mester tin korektamente pa e kultura den kua nos ta biba. Pasobra pa tur kultura tin diferensia di kon ta komportá i komuniká ku otro.
Riba Konseho.com nos ta pone regularmente un tópiko di sea komunikashon òf di etiketa i nos ta spera ku lo bo siña kon komportá korektamente pa abo tin solamente éksito den bo bida.
Tur kos bon pa abo.
Reyna Joe
Bon manera
Skibí pa Reyna Joe – 18-2-2008
Bon manera ta algu ku no ta bai fe moda nunka. Hopi hende awendia ta lubidá ku ta netamente bon manera ta manera un zeta ku ta laga komunikashon entre hende kana bon.
Un palabra dèftu pa reglanan di bon manera, ta etiketa. Etiketa ta reglanan ku hende mes a pone pa asina sòru pa nos por ta agradabel ku otro.
Etiketa ta kambia dependiendo di hopi faktor. Kultura, temporada, pais, organisashon èts. èts.
No ta eksistí si niun ambiente sin regla di etiketa. Anto pa prèt ku por ta e reglanan aki no ta skibi tur ora.
Kon nos por sa kiko ta bon etiketa?
Tur hende sa e kontesta riba esaki. Tur hende sa ki ora nan ta haña un ambiente ta korekto òf no. Pero tin hende ke ninga konsientemente òf inkonsientemente di kumpli ku e reglanan.
Un ehèmpel. Ántes ora ta bai p.e. misa tur hende tabata sa kon nan mester bisti.
Awendia sinembargo bo ta haña ku hopi hende no tin kunes. Espesialmente hende muhé ta kana bin ku pañanan bisti na nan kurpa di tal forma ku masha poko di nan kurpa ta kubri.
Anto ta reakshonnan di otro hende den misa mes ta indiká ku esaki no ta kuadra ku loke nos ta haña ta regla korekto di etiketa.
Otro ehèmpel ta uso di telefòn selular.
Ántes di bo bai un kaminda no ta nada ta stroba e kontakto sosial òf di negoshi. Awendia tin hende ta konsiderá ku nan ta asina importante ku nan mester keda risibí yamada. I nan no ta ni lanta bai papai otro kaminda òf sera e telefon.
Aki tambe bo ta mira ku ta reakshon di hendenan rondó di e suseso ta demostrá si ta bon manera esei ta òf no.
Bon manera i konsiderashon ku reglanan di etiketa, ta loke ta hasi bida dushi pa nos tur. ©www.konseho.com
Bo tin un reakshon? Mand’é na korsou@konseho.com.
08-11-2007 Etiketa den bo manera di papia Tin hopi mucha ku ta yama hende grandi na nan nòmber. Esaki riba su mes kisas no ta un problema, dependiendo di kiko e hende grandi mes ke.
Pero di kon lo ta bon pa siña nos yunan pa papia ku rèspèt ku hende en general i hende grandi en espesial?
Bo manera di komuniká ta un hèrmènt masha valioso pa bo hala hende serka bo. Espesialmente hende ku por yudabu. Hende ku lo sòru pa si bo mester di algu nan fasilitábu e.
Ke men semper ta bon patene masha kuenta kon ta papia ku hende di tur edat. I ta mayornan ta esnan responsabel pa guia nan yu pa e sa kon dirigí su mes na hende grandi.
10-9-2007
Etiketa i telefon selular
Bo por ta sea den misa, den un reunion, na skol, den empresanan, riba kaya, den supermerkado anto bo por mira ku ta parse ku hendenan di awendia no por kana mas sin nan aparato chikí pa por mantené komunikashon ku mundu kompleto.
Anto ta parse ku niun hende no por sin e aparato aparentemente mágiko aki. E kos mas remarkabel ta ku e hendenan ku ta papia na telefon hopi biaha ta faya ku etiketa pasobra nan no ta tene kuenta ku ken ta skucha nan tende nan ni den ki ambiente nan ta.
E kos mas teribel ta ku awendia si bo ta huntu ku un otro hende bo sa masha lihé si e otro hende no tin kunes ku regla di etiketa ku no ta dos hende ta huntu pero 3, 4, 5, 6, òf muchu mas. Sin bo sa bo ta meimei di hopi hende ku tambe ta eksigí atenshon di e hende ku bo at kuné.
Òf den un fiesta chikí kaminda un grupo di hende ta sinta masha amikabel mes i un ta haña un yamada ku e ta atendé tambe papiando basta largu kibrando e ambiente den kua nan ta. Òf pió ainda: na trabou den ora di trabou ta blo atendé yamadanan personal kitando for di e trabou ku mester kobra pe na fin di luna òf di kinsena sin tene na kuenta ku e dunadó di trabou tin derechi di kita e minütnan ku bo ta atendé otro asuntu for di su sèn pa e trabou ku e tin akuerdo ku abo ta hasi.
Ta zona kompliká? No pasobra bon manera ta eksigí tambe ku un hende sa etiketa di uso di telefon selular.
Na promé lugá telefon selular ta importante pa bo ta alkansabel den kasonan di emergensia. Pero ta hende mester ta konsiente di kon e tin di us’é.
Si bo ta kuri outo òf manehá kualke vehíkulo grandi no por ta posibel ku bo atenshon ta na telefon en bes di e trabou ku bo ta manehando. Un investigashon na Merka a mustra ku sigur 3% di hende ku ta manehá outo ta papiando na mes momentu na nan telefon. Ke men ku tres porshento di hende ku ta kuriendo outo no tin nan atenshon na loke nan ta hasiendo ku ta move riba kaminda públiko kaminda mas hende ta moviendo.
Papia den outo sin ku tin un rason di urgensia na telefon ta masha peligroso mes hasta ora ku ta papiando usando e sistema ku bo man ta keda liber.
Bon manera di uso di telefon selular ta nifiká ku at tene debidamente kuenta ku otro hende huntu ku bo, ku ta riba kaya na momentu ku bo ta usando e telefon selular sea ta pa urgensia òf pa kualke otro rason.
Uso di telefon selular ta algu nobo i ta pone ku nos mester bai pa reglanan di etiketa nobo den e forma aki di komunikashon.
1. No papia na telefon ora bo ta kuri outo, tene kuenta ku otro hende responsabel ku ta hasi uso di kaminda públiko
2. No papai na telefòn ora bo ta den kompania di otro hende, na trabou, den un reunion, na un fiesta, ku ta huntu ku bo pa djis un ratu, esaki ta demostrá ku bo ta ònbeskòp i no at tene kuenta ku nan. Si bo ta sperando un yamada urgente ku bo ta haña ku bo no por pèrdè informá esnan presente for di kuminsamentu i diskulpa pa bo mes na momentu ku e yamada ei drenta, hal;a bai para mas leu pa bo papia. Niun hende ta interesá den e kòmbersashon. Tene e kòmbersashon aki kòrtiku.
3. No papia na telefon den lugánan públiko, sigur no tópikonan ku mester ta diskreto i konfidensial. Tampoko grita òf papia duru durante di e kòmbersashon.
4. Pidi hende ku yama ku algu ku no ta urgente pa yamabu bek si bo ta kuriendo outo òf no ta na kas òf ofisina.
Gosa di e fasilidat ku telefon selular ta duna nos i na mes momentu desaroyá bo abilidatnan di etiketa i bon komunikashon!
*Por manda pregunta riba etiketa i komunikashon na korsou@konseho.com
Ta prohibí sin ni un eksepshon, pa kopia, reprodusí, distribuí òf adaptá tekstonan publiká riba Konseho.com sin outorisashon previo por eskrito di BISInc., segun Kondishon di uso di Konseho.com.