Tur dia tin hende ku preguntanan ku sea nan no ta yega na un dòkter pa hasinan òf nan ta duda pa bosiferá loke nan ta sinti. Dr. Heyden por kuminsá na dunabu kontesta general pero mas importante ta pa abo mes kuida bo kurpa i asina ku bo sinti algu: bai bo dòkter di kas! Tur esten manda bo pregunta libremente pa Dr. Heyden na korsou@konseho.com i spera e kontesta. Lo publiká e pregunta i kontesta sin menshon di nòmber, riba e página aki.
Kòrda kuida bo salú
140908
Bontardi Dòkter
Pa basta dia kaba mi tin un pregunta anto e ta lo siguiente,
Ora bo tene relashon anto e hende muhé hasi sèks oral ku ami komo hende hòmber anto e kos ei por tin algu malu mará na esei pa abo, aunke ku e hende muhé ta bon di salú. Si tin problema ku sèks oral kiko esei por ta?
G.
Apresiabel G.
Sèks oral ta un forma di ekspreshon seksual di dos hende si nan tur dos ta di akuerdo ku esei. Si abo i bo partner tur dos ta salú, sin niun enfermedat venériko i boso ta hasi sèks solamente ku otro, bo por akseptá ku lo no tin problema den boso kontaktonan seksual, sea ku e ta oral òf no.
Pero si un di boso tin otro relashonnan seksual di kualke forma bo mester tene kuenta ku tin riesgo na momentu ku boso bolbe tin kontakto ku otro i e riesgo ta mas grandi pa esun ku tin mas partner seksual.
Riba su mes no tin problema si ta sèks oral abo ke. Den kaso ku ta hasi sèks oral sin protekshon (di kondon) tin chèns ku e hende muhé ku ta hasiendo e sèks oral por haña malesanan venériko si e hende hòmber riba kua e ta hasié ta un hende kontagia i maske e chèns ta chikitu, lo e hende muhé ku líkido di su boka por kontagia e hende hòmber si e mes tin un malu venériko.
Abo i bo partner no por tin niun problema hasiendo sèks (oral) na un manera responsabel i teniendo kuenta ku higiena korporal.
Dr. Heyden
Apresiable Dr.
Mi ta un hende muhé di 53 aña. Mi tin 4 yu salú i nunka no tabatin problema di embaraso. Awor mi a kasa pa di dos biaha i mi tin un aña kasá. Mi kasá ke un yu pero mi no sa si ta posibel na mi edat mas. Kiko Dr. por konsehámi?
Di antemano danki.
53 aña
Apresiabel 53 aña,
Tin algun komplikashon pa embaraso riba 50 aña maske ku bo tabatin kaba embarasonan sin problema i bo yunan ta salú.
Riesgonan pa un hende muhé riba 50 aña ta ku generalmente e mester haña e yu via di un operashon sesareo, e por desaroyá diabétis (malu di suku) di embaraso i e por haña preshon haltu loke por ta un riesgo pa salú di e mes i di e yu.
Un hende muhé ku ta drenta menopousa mas lat, ke men ku su menstruashon ta tumando lugá normal ainda, lo no tin problema fásil pasobra su kurpa ta funshonando normal ainda.
Konsiderá e riesgonan sinembargo pasobra bo edat ta un punto klave pa tene na bista pa sali na estado, motibu pa kua abo i bo kasá mester pensa e desishon aki hopi bon pasobra tin riesgo. Si bo tuma e desishon ta bon pa for di promé ku bo sali na estado bo papia ku bo dòkter di kas pa e guiabu den henter e proseso pa asina ei bo embaraso ta unu responsabel maske ku bo ta riba 50 aña di edat.
Dr. Heyden
11 di yüni 2008
Bondia Dòkter
Mi tin un pregunta aki, pa basta dia mainta ora mi respu òf kualke kos, mi ta sinti mané un zür ora mi respu òf gewoon mané ora bo ta bai saka e zür ku ta bin ariba.
Kiko esei por ta, e tin di haber ku komementu anochi??
Dor ku mi ta un body builder anto mi ta uzando un produkto nobo. Por ta esei tambe ta e problema ku bo stoma no a kustumbrá kuné??
Body builder
Body Builder tin hopi chèns ku e zür ta bini di e stoma. Ta rekomendabel pa bo stòp di kome anochi i baha man na kosnan ku por iritá e stoma e.o. kumindanan ku hopi speserei, pika, alkohòl, kòfi, i sierto remedinan (ku tambe lo por ta e produktonan nobo ku bo a kuminsá usa pa hisa peso, ya ku bo no ta menshoná ta kua nan ta) etc. i wak si e zür ta baha.
Si e zür na stoma òf sensashon di ku e ta subi ta pèrsistí, ta rekomendabel pa bo bai bo dòkter di kas, ya ku tin tratamentu pa esaki.
Ademas tene masha kuido ku produktonan pa body building. Kontrolá kiko bo ta hinka den bo kurpa i promé ku bo usa un di e produktonan ei papia ku bo dòkter di kas pa e konsehábu si pa abo personalmente ta bon pa usa e produktonan ei. Kuida bo salú
Dr. Heyden
21 di yüni 2008
Dòkter mi tin problema ku mal aliento, sinembargo mi ta skeiru mi djente 2 biaha pa dia.
Dòkter por dunami un konseho kiko mi por hasi pa mi solushon’é.
Saludo
AH
Apresiabel AH
Por tin diferente rason ku un hende por tin mal aliento. Pa sa sigur ku no ta bo djentenan ta den mal kondishon lo ta bon pa bo bishitá bo dentista i laga e chèk kondishon di bo djentenan.
Den kaso ku bo djentenan no ta problema lo siguiente:
Skeiru bo djente despues i kada biaha ku bo kome. I tambe usa e hilunan pa flòs e partinan chikí ku ta keda pegá entre bo djentenan. Bo mester tambe hasié un kustumber pa bo skeiru bo lenga.
Kombiná esaki ku un líkido pa bo spula boka kuné ku tambe ta duna bo boka un bon holó. Hasi esaki tambe tres biaha pa dia despues ku bo kaba di kome. Spula bo boka entre 30 pa 60 sekònde i despues spula bo boka ku awa pa kita tur shushi.
Algu ku ta influensiá mal aliento ta tambe loke bo ta kome. Hinka mas fruta ku berdura fresku den bo kuminda pasobra esakinan ta forma natural pa dominá e bakterianan ku ta kousa mal aliento. Otro kosnan ku ta okashoná mal aliento ta bebementu di alkohòl i kòfi i humamentu di sigaria.
Mihó kos ta tòg, si e tepnan aki no duna resultado, pa bo bai tantu dentista i dòkter i laga nan ekskluí kualke rason mas serio.
Hopi éksito
Dr. Heyden
Bondia dia dòkter
Mi ta un mucha hòmber ku ta praktiká body building. Mi tin ku uza sierto produktonan manera proteina, amino, creatine i multi vitamina. Mi ta trein duru anto mi a yega na mi máksimo. Mi a bin komprondé ku lo mi mester uza un Testostorone Booster pa asina mi pasa e drèmpel pa mi kurpa por sigui krese ku múskulo.
Mi a buska unu i mi a bin haña un produkto ku ta laga bo mes kurpa produsí e tèstòsteròn awor mi ke a puntra dòkter si e produktonan aki ta bon anto kiko mas doktor por a rekomendámi.
Danki di antemano
Body builder
Apresiable Body Builder
Tèstòsteròn na promé lugá ta un hormona maskulino hopi fuerte ku glándulanan maskulino mes ta produsí. Ke men ku bo kurpa mes kaba ta produsiendo tèstòsteròn kaba. Sinembargo tin tèstòsteròn sintétiko ku nan ta traha e.o. for di lana di karné.
Lamentablemente ku tin masha hopi eksagerashon i informashon no kompletamente korekto riba uso di tèstòsteròn den deporte. Ta p’esei bo no por konfia tur produkto ku nan ta bisa ku ta bon ni pa e resultado ku e produkto mester dunabu. I tèstòsteròn adishonal den bo kurpa ta solamente responsabel bou di guia médiko i esaki ta generalmente solamente den kaso ku ta trata hende hòmber di edat haltu i/òf hende hòmber ku problema di prostat.
Loke ami ta konsehábu ta di buska guia/konseho profeshonal personal serka un dietista i/òf un médiko sertifiká i laga nan plania ku bo kiko realmente bo kurpa tin mester pa e resultado ku bo ke logra den body building. I kòrdá ku kualke resultado ku bo kurpa ta algu ku ta bai gradualmente i no tin nada milagroso responsabel ku por kambia bo kurpa di un dia pa otro. Ademas kon bo por sa ku di bèrdat bo a yega bo máksimo i kon a determiná esei?
Uso di kualke hormona sin mas por i ta hasi daño, tin biaha pa semper, na bo salú.
Mi konseho ta pa bo kontinuá ku bo uso di vitamina (lo ta mihó bou di konseho di un dòkter i pa bo sa kua vitamina bo mester di bèrdat). Ku un dieta bon balansá bo ta haña tur loke bo kurpa tin mester.
Hopi éksito.
Dr. Heyden
Preguntanan risibí den siman di 14 di desèmber 2007
Dòk mi ta un hende hòmber i mi problema ta ku ora mi tene relashon mi orgasmo ta yega hopi lihé, no ta importá ku ken.
Mi pregunta ta si por tin un remedi òf algu ku por tarda e orgasmo pa bini mas lat?
Mi tin gana di sa kiko por hasi ku esaki.
Saludo. RD
Apresiable RD
Na promé lugá mester wak semper kiko ta e kousa real ku bo ta bini muchu lihé. Mi ta asumí tres rason: 1. por ta ku bo ta sufri di un enfermedat, 2. lo bo por ta usando un remedi ku ta okashoná esaki òf 3. por ta un rason sikológiko. Mester pues identifiká ta kiko ta e rason bèrdat pa por buska e solushon korekto pa abo pasobra tin remedi pa e situashon aki.
Si bo tin un pareha fiho tin bentaha pa e situashon aki pasobra bo por tin un situashon di konfiansa kuné den kua boso por papia di bo binimentu muchu trempan. Bo por wak si bo pareha ta keda satisfasé maske abo ta haña ku bo a bin muchu trempan.
Den e kaso di binimentu muchu trempan lo bo no por haña un solushon bo so si bo ta den un relashon ku un partner figo, ta tur dos huntu mester koperá pa yega na un solushon. Ku bo pareha fiho bo por palabrá pa hasi weganan seksual promé ku tene relashon ku penetrashon pa asina ei stimulá e erekshon mas tantu i mas largu. Stabilidat den un relashon seksual ta na bo bentaha pasobra e ta yuda ku relashon di konfiansa ku tambe por yuda e problema di bo, si ta un problema e ta. Hopi éksito.
Dr. Heyden.
Apresiabel dòkter,
Mi pregunta na dòkter ta lo siguiente:
Ki dia òf momento ta e mihó momento pa tene relashon seksual sin protekshon i ku no tin rísiko pa embaraso? Por ehèmpel despues òf promé òf durante di menstruashon?
Si ta posibel dòkter por a amplia e informashon ei pa mi?
Mi lo warda riba dòkter su kontesta,
Danki di antemano
JM
Apresiable JM
Na promé lugá tene masha kuenta ku relashon seksual sin protekshon si bo no ta den un relashon serio i si bo no ke sali na estado. Ku relashon seksual sin protekshon bo ta kore riesgo pa haña un malesa seksual transmitibel (malesa venériko) ku te asta por pone bo bida na peliger.
Pa loke ta bo siklo di menstruashon esaki ta e periodo ku ta bai di e promé dia di bo regla (dia 1) te e promé dia di e próksimo menstruashon. Un siklo di menstruashon ta dura mas o ménos 28 dia. Esaki ta nifiká ku lo bo ta fèrtil rondó di dia 14, pero semper mester tene na kuenta ku lo bo por sali na estado tres dia promé te ku tres dia despues pues entre dia 11 i 17. Pa yudabo kontrolá esaki ta konsehabel pa marka e dianan riba un kalènder.
Pa sa eksaktamente kon bo ritmo ta bo mester anotá esaki sigur seis luna tras di otro pa bo ta mas sigur di e dianan ku bo tin chèns di ta fèrtil. I tene kuenta ku por tin kambionan emoshonal i mental den bo bida ku por influensiá bo siklo, ke men e sistema di kontamentu di dia, si bo bida no ta stabil, lo no ta un método konfiabel tur biaha. Si bo ta konsiderá pa tene relashon usa un protekshon semper pa bo no sali na estado.
Hopi éksito
Dr. Heyden
Bon dia dra. Heyden
Mi ta bebe te bèrdè tur mainta ora mi ta desayuná mi ke sa si e ta saludabel? Tin biaha ora mi beb’é mi ta sinti manera mi kurpa ta kuminsá bira. Kiko Dra. ta konsehámi?
Tambe mi tin un bulto di vèt na mi skouder ku ta hasi doló, pero mi dòkter di kas ta ku fakansi te ku yanüari. Kiko mi por hunta pa doló?
Danki.
SD
Apresiable SD
Mi ta asumí ku bo ke men ‘green tea’ ku te bèrdè. Si ta esei anto lo siguiente: Tin investigashonnan sientífiko internashonal ku ta rekonosé te bèrdè komo un antioksidante, ke men e ta bon pa salú general. Tin investigashon tambe ku ta bisa ku e tin un efekto preventivo riba kanser (ta antikanseroso den kaso ku bo no tin kanser ainda).
Si e ta laga bo kurpa bira bo mester wak si kisas si bo no ta trah’é muchu fuerte. Purba na traha e te bèrdè mas slap posibel i den kaso ku bo keda ku e efekto ku bo kurpa ta kuminsá bira lo bo mester stòp di us’é i skohe un otro tipo di te di yerba pa bebe.
Pa loke ta e bulto di vèt ta asina ku mester tin un diagnóstiko médiko si ta trata aki bèrdat di un bulto di vèt. Si ta un bulto di vèt di bèrdat no mester hunta nada ariba pero tuma un tablèt kontra di doló segun e indikashonnan den kaso ku e ta molostiábu.
Pa alivio real mester laga bo dòkter di kas dunabu un karta di indikashon pa un siruhano kende lo por yudabu dor di kita e bulto di vèt (si ta esei e ta trata realmente).
Hopi éksito.
Dr. Heyden
Pregunta risibí den siman di 13 di desèmber 2007
Dr. Heyden mi a dal mi man masha duru mes na un porta anto el a hincha haña bolònbònchi i a keda tur skur. Kiko mi mester hasi pa e skur kita pasobra e ta masha mahos mes i tur hende ta keda wak mi man.
Man blousá
Apresiable Man Blousá
Ora bo a kaba di dal bo man bo mester a pone eis lorá den un paña riba dje pa asina ei koha e sanger pa e no sigui plama. Despues di un dia bo por a kuminsá pone un pida katuna òf paña ku awa lou riba dje pa asina ei laga e sanger sirkulá pa stimulá e kurashon. Tin krema tambe ku bo por hunta ariba ku ta kita basta lihé e aparensia skur di e sanger kohá bou di e kueru. Den un siman bo man mester ta bèk manera e tabata promé ku bo a haña e sla.
Dr. Heyden
Dr. Mi tin un doló di djente masha fuerte mes. Tin remedi ku mi por usa pa no bai dentista.
KZ
Apresiable KZ
Mihó kos ku bo por hasi ta di bai dentista. E por yudabo mas mihó ku e doló di djente i yudabu tambe pa siña pa kuida bo djente mas mihó. Tur otro remedi di kas ta pa un ratu pero no ta dunabu un real solushon pa e doló di djente.
Den kaso di kuido dental tambe ta prevení ta mihó ku kura.
Dr. Heyden
Preguntanan risibí den siman di 23 di novèmber 2007
Dr. Heyden bonochi,
Mi ta un hóben di 30 aña, mi no ta sigur, pero mi ta sospechá ku mi ta na estado i mi tin ku bai afó na febrüari, ki dòkter ta pensa, si ta asina mi por biaha, si mi ta na estado, mi no tin seis siman ainda. Otro kos kon mi ta sa ki dia mi ta fèrtil.
Mi ta spera mi pregunta ta bon kla. Danki pasa un bon anochi
G.
Apresiable G.
Na promé lugá konfirmá ku bo ta na estado dor di bai dòkter, òf si bo ke tené privá, kumpra un tèst na botika i hasié bo mes pa tin e konfirmashon.
Si bo ta na estado: embaraso te ku 36 siman sin komplikashon no ta un kontra-indikashon pa biaha den avion. Mi ta kalkulá ku pa promé siman di febrüari lo bo tin ménos ku 16 siman di embaraso teniendo na kuenta ku aworakí bo no tin 6 siman ainda.
Un biahe kòrtiku di ménos ku dos ora lo no ta problema pero si ta un biahe mas largu bo ta bai hasi lo ta rekomendabel pa ora bo biaha durante bo embaraso bo ta mas kómodo posibel. Pidi pa un stul na pasia òf un lugá kaminda tin mas espasio pa bo pia, pa bo por lanta i rèk bo pianan i pa bo tin akseso na baño mas fásil.
Mantené bo faha di seguridat bou di bo barika i bebe sufisiente líkido (awa).
Embaraso ku riesgo altu mester keda evaluá individualmente, pa esaki mi ta rekomendá pa bo bai bo dòkter di kas. E riesgo lo por ta si bo ta na estado di un ohochi òf mas yu, si bo ta sufri di algun enfermedat króniko òf tin riesgo pa abortá. Den tur e posibilidatnan aki mester konsulta bo dòkter di kas promé bo disidí na planeá un biahe.
Pa loke ta bo siklo menstrual: esaki ta e periodo ku ta bai di e promé dia di bo regla (dia 1) te e promé dia di e próksimo menstruashon. Esaki tin un promedio di 28 dia.
Teniendo na kuenta bo edat i ku no ta konosí ningun trastorno di e ritmo i frekuensia di bo menstruashon, lo bo ta fèrtil rondó di dia 14, pero semper mester tene na kuenta ku lo bo por sali na estado tres dia promé te ku tres dia despues (pues entre dia 11 i 17). Pa yuda bo kontrolá esaki ta konsehabel pa marka e dianan riba un kalènder.
I lo ta di mas bisa ku si bo ta na estado bo mester tene kuenta ku loke bo ta kome i bebe, no huma ni usa niun sustansha toksiko i sòru pa sosegá bo kurpa sufisientemente.
Hopi éksito
Dr. Heyden
Apresiabel dr. Heyden
Mi tin un pariente ku ántes tabatin bon apetit i ta kome bon Awor e a bira grandi ku e tin 80 aña e a bira hopi pa no bisa demasiado delegá i ku un peso abou. E a kuminsá ta kome pero un plato moderá ku berdura basta dia pero tòg mi no ta mira e ta yena tòg
kiko por hasi ?
Tin algun vitamina ku por gòrda?Kome
Apresiabel Kome
Ta hopi frekuente ku den personanan di edat avansá por tin pèrdida di peso involuntario. Esaki hopi biaha debí na pèrdida di apetit ku por ta okashoná pa diferente rason.
Depreshon ta un kousa komun bou di hendenan di edat avansá ku por okashoná pèrdida di apetit i konsekuentemente pèrdida di peso ku no por splika di otro manera. E por ta kousá tambe pa trastorno emoshonal, nerviosismo, soledat, sinti bo mes laf (nada di hasi), tenshon i sensashon ku niun hende no stimabo.
Di tur manera semper promé ku nos yega na e konklushon aki mester deskartá otro kousanan entre otro: diarea króniko (ku ta dura hopi tempu), infekshon tantu agudo komo króniko, kanser, desnutrishon, kustumber di konsumo di alkohòl i humamentu, uso di prótesis bokal (plancha), pèrdida di djente òf leshon den boka ku por stroba e persona na kou bon i uso di sierto remedinan ku lo por tin komo efekto sekundario ku gana di kome ta kita. Ta rekomendabel pa konsulta bo dòkter di kas i solisitá un kòntròl médiko si e persona aki a baha un kantidat di peso remarkabel den e último lunanan sin esfuerso òf si esaki ta kompañá ku otro síntomanan.
Por duna e persona aki suplemento di vitamina i mineral ku ta bini tantu na tablèt komo líkido i ku ta spesial pa personanan riba 60 aña, pero huntu ku dieta balansá ku ta haltu na proteina i nutriente. E persona mester kome si na orarionan fiho.
I si resultá ku e por ta okashoná den e kaso aki dor di un di e kousanan ariba menshoná, mester sigui e tratamentu médiko.
Hopi éksito.
Dr. Heyden
Apresiabel Dr. Heyden,
Mi ta sufri di preshon haltu pa kual mi ta usa un remedi.3x pa siman mi ta fitness/cardio i landa pa purba di tene e preshon i peso bou di kòntròl. Esaki mi ta hasi ya kasi un aña.
E peso ta baha poko poko i 2 siman pasá ku mi a bai midi e preshon, e tabata 160/90. Mi tin 45 aña di edat.
Último luna mi ta sinti poko molèster di kram den mi pia (kuit), prinsipalmente mainta ora mi lanta for di soño.Tambe mi ta ripara ku na mi bèl di pia tin vários ader fini a rementá loke no ta duna bunita bista.
Mi preguntanan ta:
1. Kiko por ta e motibu ku mi ta sinti kram i kiko mi por hasi pa evitá esaki.
2. Kiko ta e motibu ku mi adernan ta rementá i kiko mi por hasi kontra di esei.
Atentamente,
A.
Apresiabel A.
Spatadernan ta ader ku ta hancha pa motibu di un mal funshonamentu di e valvulanan di e venanan, ku bou di kondishonnan normal ta transportá kantidatnan chikí di sanger pa bo kurason i nan ta sera pa evitá ku e sanger lo sirkulá den direkshon kontrario. Ora e valvulanan no ta sera adekuadamente e ta produsí un oumento di preshon den e venanan afektá ku ta hasi ku su murayanan ta hancha i e sanger aki den ta paralisá, lokual ta kousa e trastorno di sirkulashon di sanger adekuá.
Ademas spatadernan ta bai mas leu ku djis no pèrmití lusi un pia bunita, pues ku na okashon e porta un molèster hopi grandi ku por lagabo sinti kram, doló kontinuo i sensashon ku e pianan ta pisá i ta pika.
Síntomanan mas komun ta entre otro kram den pia, ku venanan ku ta oumentá di tamaño, ku ta manera forma bulto bou di e kueru, doló, tenshon, tambe kambio di kolorashon dje kueru rondó di ènkel i batata di pia.
Tin vários faktor ku por okashoná e malu aki, den kua un di esnan mas komun ta herensia ya ku por lo ménos 2 pa 3 miembro di un famia lo por ta sufri di esaki.
Tambe sekso ta predeterminá aparishon di esaki ya ku e ta 4-6 biaha mas frekuente serka hende muhé ku serka hende hòmber. Otro faktornan pa okashon’é por ta embaraso, uso di tablètnan antikonseptivo òf otro hormonanan, permanesé hopi tempu den e mesun posishon ya sea ta pará òf sintá, uso frekuente di faha òf mea pèrtá, alkohòl, kustumber di huma, bida sedetario i obesidat.
Pa evitá posibilidat di empeoramentu di e malesa aki ta rekomendabel evitá keda pará hopi den mesun posishon òf sintá ya ku esaki ta stroba e bon sirkulashon di sanger. Tambe por drumi ku bo pia riba nivel di bo kurpa manera pone un kusinchi bou di bo pianan, finalisá bo ducha normal ku awa friu riba e pianan, oumentá konsumo di alimentonan riku na vitamina C manera apelsina, lamunchi, broccoli i tambe vitamina E manera berduranan ku blachi bèrdè, nèchi i webu.
Ta importante pa ora bo tin señal di spatader pa bo akudí na bo dòkter di kas pa esaki determiná kon serio e malesa aki ta den bo kaso, kua ta e tratamentu adekuá pa bo (por bai fo’i simplemente rekomendashon òf un tablèt te na un inyekshon (escleroterapia) ku ta posibilitá e desaparishon di esaki òf sirugia den kasonan grave).
Den bo kaso spesífiko ta bon pa bo sigui ku bo ehersisionan ku ta mantené bo kurpa aktivo i ta kontrolá bo peso, kontrolá bo dieta pa mantené bo preshon abou i NO stòp ku bo remedi. Tambe wak si bo sapatunan ta bon. Hopi éksito.
Dr. Heyden
Preguntanan risibí den siman di 2 di novèmber 2007
Dr. Heyden kon ta bai,
Aña pasa novèmber mi a bai dòkter pa un doló di kabes ku no ke a kita i mi a haña un pulchi blanku largu ku un strepi bèrdè na rant pa bebe. E remedi aki tabata masha bon mes i mi doló di kabes a kita. Awor mi a bai luna pasa atrobe dòkter pero e no sa ta kua pulchi ta blanku ku bèrdè i ami a benta e paki afó. Anto awor mi doló di kabes a bolbe lanta. Dr. Heyden abo por bisami ki yama e remedi pa doló di kabes ku ta blanku ku un strepi bèrdè na banda?
Masha danki di antemano.
Urgente.
Saludo Urgente,
Na promé lugá mi mester bisabu ku bo no mester benta nunka e empake di remedi afó si bo tin intenshon na bai ripití e remedi. Tambe ta bon pa tur dòkter ku lo bo bishitá den futuro sa kua remedi bo a haña kaba, ke men buska un blòknot chikí i skibi tur remedi ku bo haña na dòkter, pakiko e dòkter a dunabu e, e fecha ku bo a hañ’é, na kua botika bo a hañ’é i ki yam’é e remedi. Warda esaki bon i laga bo hendenan di kas sa na unda e lista aki ta pa den kaso ku bo ta den un urgensia médiko.
Pa loke ta e pulchi ku bo ke men mi mester desapuntábo pasobra niun dòkter por djis asumí ku nan sa ta kua remedi bo ke men. Ademas no sa pakiko e dòkter a dunabu e remedi; si ta direktamente pa e doló di kabes òf ta pa un kombinashon di indikashon médiko. Ke men no ta fásil pa djis kontestábu kua remedi tin kua forma pasobra tin hopi remedi meskos den diferente empake i tin remedi ku por ta parse otro pero nan ta pa diferente otro malesa.
Por fabor kuida bo kurpa i koperá ku bo dòkter dor di sa kua remedi bo tabatin i pa evitá tur problema warda bo empakenan di remedi.
Den e kaso aki di bo doló di kabes: laga bo dòkter hasi un análisis di e simptomanan ku bo tin, eventualmente lagabu hasi tèst pa despues e preskribí un tratamentu ku lo por inkluí remedi. Hopi éksito.
Dr. Heyden.
Bonochi dr. Heyden
Ami i mi famia ta hopi rabia pa e loke a pasa nos ayera nochi. Nos wela a bira malu den kareda di 10’or anochi i ora ku nos a yama e dòkter na warda el a hasi yen pregunta i a bisa nos duna nos wela un paracetamol i bin konsulta kuné mainta trempan. Nos a bolbe yama ora nos Wela a sigui sinti su kurpa malu, el a bolbe puntra masha kos i a bisa nos pa hib’é poli. Pakiko tin un dòkter na warda si e no ta bin wak nos pashènt na kas? Dr. Heyden nos ta hopi rabia ku esaki i nos ke pa tur dòkter na warda sa ku nos no ta gusta e kos aki.
Rabiá!
Apresiable Rabiá,
Na promé lugá mi mester bisabu ku komo dòkter mi sa ku tur hende ku tin un hende malu ta haña ku nan kaso ta esun di mas urgente. Pero dòkternan na warda hopi biaha ta haña nan ku pashèntnan ku tabata malu henter dia òf for di den siman i nan ta warda nochi sera i fin di siman abri pa nan bai dòkter. E dòkter na warda tei pa kasonan di urgente. No pa kasonan ku por keda tratá den oranan di konsulta normal.
Mi no por kontestá pa e dòkter ku no a bin wak bo wela pero e preguntanan ku el a hasi ta netamente pa e evaluá si ta trata bèrdat di un urgensia pa e por aktua. Kòrda bon ku un dòkter a hura ku e ta trata na salba bida ke men si e nota ku tin urgensia e mester sali bai. Den kaso ku esei no a sosodé ta pasobra tabatin faktornan ku esun ku a yama a kontribuí n’e basá riba informashon ku el a duna i ku a pone ku e dòkter a skohe pa pidi pa bini konsulta mainta òf pa bai Poli. Mandando e hende malu Poli ta normal ku e ta yama Poli pa informá su kolega ku ta na warda einan ku tin un kaso ku e ta kalkulá di ta urgente i e ta evitá ku boso ta pèrdè tempu dor di bai serka dje promé. Mi ta spera ku bo wela a sigui bon i hopi éksito.
Dr. Heyden
Preguntanan 19 -10-2007
Kon ta bai Dr. Heyden
Mi tin 15 aña anto mi tin un amigu ku kua tambe mi tin sèks
Mi amigu no ke usa kondon pasobra e ta bisami ku e kos ei no ta na nodi.
Mi no ke pa e lagami pero mi no ke sali na estado tampoko.
Kiko ta e mihó antikonseptiva ku mi por usa spiral of pel?
Hóben di 15 aña
Apresiable Hóben di 15 aña
Na promé lugá mi ta kere ku bo mester tin masha kuidou pasobra hasi sèks sin protekshon no únikamente por lagabu sali na estado pero bo por pega tambe ku un malu venériko. Na di dos lugá bo ta hopi hóben pero grandi sufisiente pa defendé bo mes. No hasi sèks sin protekshon. Pa loke ta e antikonseptiva lo ta bon pa bo pasa na Famia Planía pa haña konseho pa sa kua antikonseptiva ta bon pa abo personal òf bai serka un dòkter di konfiansa.
Hopi éksito.
Dr. Heyden
Dr. Heyden saludo
Kon mi por sa si mi sanger i esun di mi frei ta bai ku otro? Mi a tende ku tin biaha ku bo sanger no ta bai ku otro ku bo por haña un yu mankaron.
S.C.
Apresiable S.C.
Mi no sa kiko eksaktamente bo ke men pero lo ta bon pa bo bai serka bo dòkter di konfiansa i lague konsehábu. E lo por laga boso eksamináboso i laga boso hasi tèstnan pa wak si boso sanger ta kompatibel pa traha un yu. Pero mester wak kada kaso individual ke men ku no por sin mas bisa ku boso sanger no ta kompatibel.
Saludo.
Dr. Heyden
Preguntanan 28 -9-2007
Dr. Heyden kon ta bai
Mi tin masha bèrgwensa mes ku mi ta basta gordo i mi a hasi tur sorto di kos pa baha peso. Mi a asta keda un luna sin kome i bebe so i no a baha nada. Mi ke bai hasi un operashon awor pa saka vèt i baha mi peso. Unda ta e mihó kaminda pa mi bai pa esei?
Hopi gordo
Apresiable Hopi gordo
Promé ku bo konsiderá pa hasi un operashon lo ta bon pa bo papia ku bo dòkter di kas i lag’é konsehábu kua spesialista médiko ta mihó pa bo bai pa wak eksaktamente kiko ta pone ku abo no por baha di peso. E por ta un kondishon hereditario. Bo por tin otro faktornan ku no ta konosí pa bo. Banda di esaki bo mester wak mas mihó kiko bo ta kome. No ta responsabel pa sin guia médiko bo keda sin kome un luna largu pasobra bo kurpa por keda ku konsekuensia. Promé ku kualke otro akshon analisá diariamente kiko bo ta kome. Kuantu kaloria bo ta haña realmente aden tur dia. Hopi biaha un hende ta kere ku e no ta kome mashá pero e ta komiendo muchu pa su estatura, edat ets. ets..
Despues di tur e konsiderashonnan aki por bai wak si ta operashon ta un solushon pa bo. I pa esaki bo mester hasi pregunta pa sa si e dòkter ku ta bai operábu tin eksperensia ku e loke e mester hasi pa bo. No konfia loke otro hende ta bisa. Pidi e dòkter pa bo sa ken mas el a ópera i si por bai papia ku e hende(nan). Kon su estilo di ópera ta, por mira despues sikatris òf e ta hasié estetikamente perfekto? Buska informashon tambe riba riesgonan ku por tin pa abo spesífikamente. Bo ta salú?
E mihó kos ta pa papia honestamente ku bo dòkter di kas pa asina ei e por guiabu profeshonalmente den kualke desishon ku bo ta tuma. Hopi éksito.
Dr. Heyden.
Dr. Heyden saludo,
Mi tin un yu di dos aña i su oreanan ta hopi grandi. Mi no ke pa ora e bai skol nan tent’é. Mi por laga ópera su orea pa nan bira normal.
Mama prekupá
Sra. saludo,
Na promé lugá mester laga un dòkter wak e yu i bisa ku di bèrdat su orea ta muchu grandi pa su kurpa i su edat. Tambe mester sa si esaki ta un fenómeno ku tin den abo òf su tata su famia. Despues por yega na un diagnósis ku si di bèrdat su orea ta muchu grandi.
Pa loke ta un operashon di su orea mester tene kuidou pero den kaso ku di bèrdat e orea ta muchu grandi por laga un spesialista médiko wak e i disidí si i ki momentu por hasi e korekshon na e ora.
Dr. Heyden
Preguntanan 21 -9-2007
Kon ta bai dr. Heyden
Mi tin un yu muhé di 5 aña ku anochi ta lanta hunga ku su kosnan di hunga i ta sali for di kamber bai den kas su so. Ora mi bai kue pone beek den su kama e ta sigui drumi i mainta e no sa mes ku el a lanta kana, hunga i bai den kas. E no ta ni parse di ta kere di a soña esaki. Komo ku mi ta biba mi so ku mi yu mi tin miedu ku un dia lo mi no lanta ora e ta kana na soño i ku e por sali bai kaya i algu malu por pas’é.
Kiko mi por hasi?
Mama prekupá
Apresiable Mama prekupá
Loke ta pasa ku bo yu ta kana den su soño . E nòmber sientífiko pa e komportashon aki ta sonambulismo i e ta algu ku ta sosodé mas tantu bou di mucha hòmber entre 6 pa 12 aña pero mucha muhe i hende grandi tambe sa sufri di dje. Te ainda sientífikonan no a yega na un kontesta di kiko ta okashoná sonambulismo pero hopi biaha un mucha ta hañ’é ora e ta masha aktivo mes durante di dia, ku el a eksperensia sierto tenshon, si e ta hopi kansa, si e no ta drumi sufisiente òf ku e ta usa sierto remedi. Sonambulismo ta sosodé tambe durante di e parti di mas profundo di soño di un hende. Un kos notabel ta ku hopi biaha sonambulismo ta sosodé den sierto famia, ke men si un mayor a hasié na mucha chèns ta grandi ku su yu tambe ta bai hasié. Ta bèrdat ku un hende ku ta sufri di sonambulismo no ta kòrda mes mas kiko el a hasi. Si bo lant’é tambe durante ku e ta hunga ku su kosnan di hunga òf ora e ta kana den kas mei anochi lo e keda tur konfundí i te asta bo por spant’é. Ke men ku ta bon ku bo ta djis kana bai su kama kuné pa e sigui drumi.
Por duna remedi pa sonambulismo pero e mihó kos ta di laga e mucha krese pasa dor di e periodo di bida aki. Personalmente lo mi konsehá pa bo pone un sèrbètè grandi muhá dilanti di su kama ku ora ku e baha for di e kama e ta haña e sensashon desagradabel di ta pará den awa, loke ta lant’é i pone ku e mes ta bai drumi atrobe.
Pero por si a kaso esei no yuda mantené e seguridatnan p.e. di pone un bèl òf algu ku ta zona na su porta di kamber i bo porta di kas di moda ku ora e sali fe su kamber òf for di porta di kas ku e zonidu ta lanta e òf abo.
Dr. Heyden
Dr. Heyden mi tin un pregunta.
Mi tin un yu hòmber di tres aña i tur biaha ku nos kuri un distansha un tiki largu den outo e ta mariá. Tin biaha nos un ta ni dies minüt den outo. Mi a pon’é sinta dilanti den outo pero ainda e ta bira malu i tin biaha e ta asta saka.
Kiko mi por dun’é pa e kos ei stòp.
Saskia
Saludo Saskia
Na promé lugá no por laga mucha chikitu asina ei sinta dilanti den outo pa nan mes seguridat. Si (loke nos nunka ta spera) bo mester haña un aksidente e yu por pèrdè su bida. Un mucha por sinta dilanti den outo solamente si e tin e largura di kurpa pa por wak afó dilanti di e outo. Pa loke ta e mariamentu: tin remedi pero no tin masha remedi pa mucha pa e malesa aki. Tin remedi ku ta dominá e mariamentu i e sakamentu pero e ta un sedante tambe. Tambe tin sierto efekto sekundario p.e. e mucha ta bira masha iritá i e por drumi muchu largu loke no ta konsehabel pa un distansia kortiku.
Loke bo por hasi ta evitá di papia riba e mariamentu i no hasié un prekupashon pa e yu. No lag’é kome nada muchu vèt promé ku bo sali kuné. Un buskuchi seku sin nada ariba por yuda wanta su stoma.
Tambe lag’é sinta riba un stul i kusinchi haltu di moda ku e por wak pafó di e outo durante di e kareda. Esaki ta yud’é pa enfoká ku su wowo riba algu na distansia i su selebre outomátikamente ta kompensá di e forma ei pa e moveshon di e outo. Lag’é tene un kos di hunga den su man i kanta kuné durante ku bo ta kuri ya e ta kita su tinu for di su stoma.
Éksito ku boso próksimo keirumentu den outo.
Dr. Heyden
Bo tin pregunta? Manda bo pregunta libremente pa Dr. Heyden na korsou@konseho.com i spera e kontesta.
