Korsou, 16 di yanüari 2008
‘Bai skol pa bo konta’
Mensahe oudiovisual di minister di enseñansa Omayra Leeflang
Willemstad – ‘Bai skol pa bo konta’, ta lema di e spòt motivadó di Ministerio di Enseñansa di Antia, pa pone aksento riba e Lei di Enseñansa Obligatorio adaptá, ku ta na vigor for di dia 1 di ougùstùs último i ku ta konta pa mucha i hóben di 4 pa 18 aña. Antia ta promé pais na mundu ku un lei di enseñansa obligatorio di 4 pa 18 aña.
Minister di Enseñansa Omayra Leeflang a skohe pa netamente den e temporada di karnaval aki aksentuá kon importante baimentu di skol ta bou di tur sirkunstansha i na tur momentu.
E Lei di Enseñansa Obligatorio ku tin aktualmente ta kubri un grupo mas grandi di hóben kompará ku esun anterior. P.e. a subi edat ku mester ta na skol di 16 pa 18 aña i a konektá e Lei di Enseñansa Obligatorio nobo na e proyekto Formashon Sosial Obligatorio. I e lei aki ta e parti di mas importante di Deltaplan ku ta e plan introdusí pa minister Leeflang pa duna nos hóbennan di tal forma un chèns pa nan tambe haña oportunidat den bida, ku nan ta kla pa traha i pa nan por partisipá optimalmente den komunidat.
Minister Leeflang a mustra ku ta di e forma aki so nos pais por yega na un generashon di hende ku ta garantisá, maske ta obligatoriamente di e chèns pa haña edukashon mas tantu posibel.
Ku un spòt oudiovisual di 45 sekònde e mandatario ta rekordá tur hende ku pa bo konta realmente den bida bo mester bai skol. E mandatario a konektá esaki na prestashonnan di ekselensia resien di nos deportistanan hóben den eksterior. “Meskos ku nos ta orguyoso di nan, nos mester ta orguyoso tambe di e hóben ku yega ‘finish’ na skol i ku ta haña un diploma ku ta sertifik’é di ta un hende ku por konta’, asina minister Leeflang a mustra.
‘Hubentut ta nos futuro, nos rikesa i nos mester yuda nan konta’, segun e mandatario a enfatisá.
E spòt oudiovisual ku ta bai pasa durante di un periodo definí na tantu Telecuraçao komo TV11, ta dura 45 sekònde i ta duna imágennan di éksito deportivo i éksito profeshonal basá riba un formashon eskolar. E sinta kòrá kibrá den e spòt ta indiká ku a yega ‘finish’ eksitosamente ku un diploma.
E spòt oudiovisual ‘Bai skol pa bo konta” ta realisá pa Image Productions ku tabata enkargá ku e parti tékniko i Bright Ideas & Services ku tabata enkargá ku e parti kreativo. Un gradisimentu ta bai espesialmente na Biblioteka Públiko, Kuerpo Polisial, Hospital Atvènt i tur deportista ekselente pa a pèrmití pa a graba i usa nan imágen pa demostrá éksito deportivo i eskolar.
