Preguntanan risibí den siman di 1 di òktober 2007

Madam Katrina kon ta bai
Mi ta spera ku bo por dunami un bon konseho pa e prekupashon ku mi tin. Mi tin dos aña ta frei un mucha hòmber anto algun siman pasa mi a bin haña sa ku e tin un otro mucha muhé ku tin un yu ya kaba di tres aña kuné. Mi a konfrontá mi frei ku esaki i e ta bisami ku mi ta keda kuné tòg pasobra e ke ta ku mi. I e no ke papia riba e tópiko. Asta e ta rabia mes mes ora mi eksigi'e pa papia riba e tópiko. Kiko mi mester hasi?
Desapuntá

Apresiable Desapuntá.
Lamentablemente ku e situashon aki no ta algu ku ta pasa ku bo so. Hopi hende muhé ta haña nan den nos komunidat ku hende hòmbernan ku no ta honesto ora nan disidí na drenta un relashon. E kos mas importante ta loke abo ke pa bo mes. Si un hende no ta honesto awe lo e no ta honesto nunka mas. I si e no ke papia ta pasobra e no ta respetabu.
Úniko konseho sinsero ku ami por dunabu ta pa sali purá for di e relashon ei maske kuantu bo stim’é i spera riba un hende ku si ta dunabu balor di sikiera papia ku bo riba problemanan ku por sosodé den boso bida. Anto kòrda semper ku e promé hende ku mester stima i protehá abo ta bo mes.
Si bo ta kreyente bo por resa tambe na San Miguel Arkangel pa e lagabu vense e situashon difísil aki.

Orashon:
San Miguel Arkangel abo ta kargadó di tur trahadó den reino di Dios. Hasi ku tur e kosnan malu ku ta pasando ku mi ta bai bèk leu for di mi sin ku ami mester gasta niun palabra ku esnan ku ta hasi malu ku mi. Protehámi ku bo spada mágiko pa niun hende, nunka mas, no por hasimi daño. Amèn.
Resa tambe un nos Tata..
Hasi e orashon aki seis dia largu kuminsando riba un djaluna.

Madam Katrina

Apresiable Madam Katrina
Kiko mi mester hasi kontra di kolega envidioso. Ta parse ku e otro koleganan ta kontra mi i nan ta papia hasi redu riba mi. Por fabor lagami sa kiko mi mester hasi.
Kolega falsu.

Apresiable Kolega falsu
Wak semper pa no ta abo ta esun ku ta kuminsá hasi kos falsu den niun situashon.
I si por: konfrontá e koleganan ku segun abo ta papia riba bo. Pasobra kon bo por sa esei? Si ta un otro kolega a bisabu lo ta interesante pa sa ku ora tabata papia riba bo si e tambe a partisipá. Ki ta su rason pa bisabu? Su konsenshi ta molosti’é?
Den kaso ku bo ta traha un kaminda anto bo no ta sintibu kómodo ku e ambiente den kua bo ta trahando; ami semper lo rekomendábu pa kita for di trabou bai traha un kaminda ku bo por ta trankil i ku bo por gana bo sèn trahando ku pas mental.

Madam Katrina

Preguntanan risibí den siman di 28 di sèptèmber 2007

Apresiable Madam Katrina,

Mi ta un mucha muhé di 16 aña anto mi mama no ta lagami sali bai fiesta mi so. Mi ta bis’é ku mi no ta hasi nada malu pero e ta bisami ku mi no sa kon mundu ta. Kon mi por lag’é lagami bai fiesta tòg mi so ku un par di amiga i amigu?
Danki.
Mucha muhé di 16 aña

Apresiable Mucha muhé di 16 aña,
Na promé lugá komprondé ku bo mama ta stimabu i ta p’esei e no ke pa nada pasa ku bo. Ta ki sorto di fiesta bo ke bai? Ken ta e amigu i amiganan ku bo ke bai kuné? Purba na papia ku bo mama un biaha (i mas biaha tambe si mester) pa konvensé ku bo no ta bai niun kaminda straño i ku bo ta paga tinu na ku ken bo ta kana.
Tambe puntr’é si e ke bai ku bo maske ta un biaha pa e mes wak.
Anto mi ta di akuerdo ku bo mama si ku bo ta hopi hóben i ku tin peliger ku bo no por antisipá.
Tur esten siña bon na skol pa bo por bira un hende grandi ku por kuida su mes.
Madam Katrina

Apresiable Madam Katrina
Mi ta un hende muhé soltero di 39 aña ku ta traha na un ofisina i ku ta pasando den un problema grandi pasobra mi ta pasando den un periodo di masha mala suerte mes. Ta parse ku nada no ta bai bon, amistatnan ta hala for di mi i sèn no ta drenta i si e drenta no ta keda. Kon mi por kaba e situashon fastioso aki?
Desesperá

Apresiable Desesperá
Niun momentu den bida no tin motibu pa bo desesperá si bo tin fe den un Ser Supremo ku nunka ta laga abo na kaya. Bida tin hopi fase i kada tantu tempu un hende ta pasa den yen di kos bon i despues kisas, dependé di sierto sirkunstansha e lo por pasa den un tempu di situashonnan ménos bon i agradabel. E kos ta ku ora nos ta den bon hopi biaha nos ta lubidá di invertí pa ora situashon kambia. Anto nos ta lubidá ku mulina di bida ta subi i baha i ku ora bo ta ariba bo mester prepará pa si e baha (muchu) abou.
Bon mirá loke nos ta mira ta ku mester plania bo bida pa limitá òf evitá ku situashon por bira duru finansieramente òf den relashon ku otro hende.
Si bo ta un Kristian, kalma tur esten awor aki e mal influensianan kuminsando bo dia ku un orashon na San Fransisco di Assisi durante di 6 dia tras di otro. Esaki ta e orashon pa kalma situashonnan i trese pas i trankilidat den bo bida.Teksto di e orashon aki ta:

Dios hasimi instrumento di Bo pas
Kaminda tin envidia, laga ami sembra amor
Kaminda tin ofensa, pordon
Kaminda tin duda, fe
Kaminda tin skuridat, lus
I kaminda tin tristesa, alegria.
O Maestro Divino
Hasi ku ami no ta buska pa haña konsuelo pero ku ta ami ta konsolá
Pa mi no haña komprenshon pero ku ta ami ta esun ku ta komprondé;
Pa mi no haña stimashon pero ku ta ami ta esun ku ta stima
Pasobra dunando nos ta haña
I pordonando nos ta haña pordon
I ta muriendo nos lo lanta bèk den Bida Eterno

Amèn.

Resa tambe un Ave Maria i sende un bela blanku (tene masha kuidou si ku peliger pa kandela i no laga bela sendé si bo no ta na kas).
Madam Katrina

Preguntanan risibí den siman di 21 di sèptèmber 2007

Apresiable Madam Katrina
Mi yu muhé di 14 aña tin un frei di 27 aña. Mi no ta di akuerdo ku esaki pasobra e mucha hòmber ta muchu grandi pe. Mi yu no ke tende i mi no sa mas kiko hasi.
Yudami Madam Katrina promé ku e sali na estado.

Tratando na evitá problema

Apresiable Tratando na evitá problema
Bon mirá bo tin un problema grandi kaba. Edukashon di yu no ta kuminsá ora yu tin 14 aña pero pa e yu ei obedesebu ku 14 aña esaki mester tabata reglá kaba for di dia e tabatin un aña.
E peliger ta ku mas bo kritiká e relashon i e mucha hòmber, mas bo yu lo ke ta serka dje sigur si e hòmber aki ta gasta hopi sèn n’e i dun’é atenshon. Ke men bo mester usa masha táktika pa guia bo yu. Bèrdat ta ku un hòmber di 27 aña no ta pareu di un mucha di 14 aña. Su influensia difisilmente por ta positivo pasobra e tin mas eksperensia di bida i seksual. I sigur e no ke bo yu djis pa kòmbersá kuné.
Si bo sospechá ku nan tin relashon seksual hasi un denunsia na polis pasobra pa lei ta kastigabel pa tene relashon ku un mucha muhé di 14 aña. E ta bai será i abo a skapa pa un temporada di dje. Bo por konfrontá e hòmber ei tambe i bis’é ku bo ta tuma akshon pasobra e ta muchu bieu pa bo yu. I sigui papia i papia i papia ku bo yu.
Komo mama ta abo ta bai keda responsabel pa kualke konsekuensia i ta p’esei bo no por sinta wak sin tuma akshon.

Madam Katrina

Apresiabel Madam Katrina
Nos ke a saka un potrèt ku famia pero un di mi rumannan no ke pa saka potrèt di dje. El a bin ku yen rason pa no saka potrèt i no ta mira pakiko nos mester saka un potrèt di henter famia huntu. Ami ta haña ku nos mester tin rekuerdo di tur hende huntu awor ku nos tur ta na bida. Despues nos ñetu i subrinonan i otro muchanan ku ta lanta den famia por mira kon nos tabata i ken nan parse.
Kon por konvens'é pa saka potrèt tòg?

Potrèt di famia

Apresiable Potrèt di famia
Bo no sa nunka di kon un hende no ke saka potrèt. Ta algu di skonde e tin? Ta ke e no ke pa por rekonosé riba un potrèt? Bèrgwensa e tin di su famia?
Miéntras ku bo no sa pakiko e ta asina fuerte kontra di sakamentu di potrèt ku su famia bo no por tuma niun akshon real.
Mi ta rekomendá pa saka e potrèt tòg huntu ku esnan ku si ta mira balor di famia. Si e ke pa historia konta ku e no tabata eksistí anto esei ta su desishon i tur otro hende mester respetá esei. Traha un kopia si di e potrèt ora boso sak'e, hink'e den leshi nèchi i dun'e pa e sa kon tremendo i bunita su famia ta, maske ta sin dje.

Madam Katrina

Preguntanan risibí den siman di 3 di sèptèmber 2007

Apresiable Madam Katrina
Resientemente mi a pasa den un eksperensia hopi fastioso. Un prima di mi ku semper mi tabata hopi bon kuné, for di mucha a kuminsá tratami straño i awor aki e no ta papia ku mi mas. Mi a aserk’é pa wak kiko por a pasa i e a bisami ku mi sa masha bon i ku ta ami ta hasi straño kuné. Kiko mi mester hasi pasobra e kos aki a lagami ku hopi duele.
Danki

Ku hopi duele A.G.A.

Apresiable Ku hopi duele
Na promé lugá no laga nada duel bo. Bo prima no ke atendé ku bo mas ta pasobra ta e tin un problema sino lo e a bin bisabu algu ku e no a gusta di bo. Hopi biaha tambe hendenan den nos bida mester sigui bai sin nos i kisas ta esaki ta pasando ku bo prima. Dun’é espasio. Buska otro amistat. I komprondé ku nunka lo bo sa kiko ta motivashon di bèrdat di e prima ei.
Hopi éksito.

Madam Katrina

Apresiable Madam Katrina
Ami i mi kasá tin pleitu e dianan aki pasobra nos ta sperando nos promé yu pa novèmber próksimo. Ami ke yama e yu un nòmber fásil pero mi kasá a disidí ku e yu mester haña un nòmber ku ta straño i ku otro hende no tin. E ke yam’é Yuviesko si e ta mucha hòmber i Yuvieska si ta mucha muhé. Mi problema ta ku e nòmber ei no ta zona nada. Ademas mi no sa di ki idioma e ta i tampoko kiko e nòmber ta nifiká. Kiko si e ta un palabra malu den un otro idioma? Kon mi por splika mi kasá ku n’e no mester duna e mucha un nòmber ku henter su bida lo e keda kuné manera un peso? Mi ta fadá ku e kos aki.

Alida

Apresiable Alida
Siendo na estado ta masha malu pa bo kunsumí i ta fadá pasobra esaki ta influensia e yu. Si bo kasa no ta komprondé anto mester wak kon ta papia kuné. Kisas un hende di konfiansa den boso famia? Tambe puntra bo kasá dikon e nòmber ei. Ta den un pelíkula e a wak e? Den un buki e a les’é? Kisas e si sa e nifikashon.
Anto komprondé ku den un relashon ta dos hende mester disidí huntu ke men no por ta asina ku ta e ta obligábu di akseptá e nòmber. Pero awor aki lo mas importante ku e nòmber ta bo salu i di e yu tambe. Purba keda trankil.

Madam Katrina

Apresiable Madam Katrina

Mi ke sa ki dia ta mihó dia pa kumpra number pa asina ei mi por haña sèn pa hasi algun kos ku mi ke hasi. Danki.

Buskando Suerte

Apresiable Buskando Suerte,
Pone atenshon na posishon di luna. Tin diferente aspekto ku bo mester paga atenshon n’e pero e temporada mas benefisioso ta ora ku luna ta kresiendo i sigur e siman promé ku luna yen te dos dia despues di luna yen. Wak tambe e orario ku bo ta bai kumpra number. No kumpra den e promé mitar di ora ku e man di oloshi ta bai abou pero purba entre e di dos mitar ora ku e man di oloshi ta bai ariba.
Hopi éksito.

Madam Katrina